kaise pitam ke nayan ram hua karte the

kaise pītam ke nayan raam huā karte the

vo jo rādhā thī to ham shaam huā karte the

dil ke sab zaḳhm tire naam huā karte the

vo yūñhī shahr meñ badnām huā karte the

jin charāġhoñ pe haiñ ab tohmateñ be-nūrī kī

vo havāoñ meñ sar-e-bām huā karte the

aao phir hijr-e-musalsal kī rutoñ meñ DhūñDeñ

ka.aba-e-dil meñ jo asnām huā karte the

mausam-e-qaht meñ āñkhoñ se chhalak jaate haiñ

chand qatre jo tah-e-jām huā karte the

ab to guzre hue lamhe bhī bhulā baiThe haiñ

varna ham sāhib-e-ilhām huā karte the

ab jo āġhāz-e-mohabbat se gurezāñ haiñ vo log

be-niyāz-e-ġham-e-anjām huā karte the

ajnabī ban ke jo milte haiñ 'razī' rāhoñ meñ

un ko ham se bhī kabhī kaam huā karte the

kaise pitam ke nayan ram hua karte the

wo jo radha thi to hum sham hua karte the

dil ke sab zaKHm tere nam hua karte the

wo yunhi shahr mein badnam hua karte the

jin charaghon pe hain ab tohmaten be-nuri ki

wo hawaon mein sar-e-baam hua karte the

aao phir hijr-e-musalsal ki ruton mein DhunDen

kaba-e-dil mein jo asnam hua karte the

mausam-e-qaht mein aankhon se chhalak jate hain

chand qatre jo tah-e-jam hua karte the

ab to guzre hue lamhe bhi bhula baiThe hain

warna hum sahib-e-ilham hua karte the

ab jo aaghaz-e-mohabbat se gurezan hain wo log

be-niyaz-e-gham-e-anjam hua karte the

ajnabi ban ke jo milte hain 'razi' rahon mein

un ko hum se bhi kabhi kaam hua karte the