kaise samjhaun nasim-e-subh tujhko kya hun main

kaise samjhā.ūñ nasīm-e-sub.h tujh ko kyā huuñ maiñ

phuul ke saa.e meñ murjhāyā huā pattā huuñ maiñ

ḳhaak kā zarra bhī koī tere dāman meñ na thā

qadr kar ai zindagī TuuTā huā taarā huuñ maiñ

har dhaḌakte dil se an-jānā sā rishta hai mirā

aag dāman meñ kisī ke bhī lage jaltā huuñ maiñ

apnī tārīkī sameTe pūchhtī hai mujh se raat

kaun sī hai sub.h jis ko DhūñDhne niklā huuñ maiñ

mujh ko samjhā.e to koī rāzdār-e-kā.enāt

mujh meñ hai ābād ye duniyā ki ḳhud apnā huuñ maiñ

zindagī TuuTe hue ḳhvāboñ meñ guzrī hai to kyaa!

aaj bhī ik ḳhvāb āñkhoñ meñ liye baiThā huuñ maiñ

samt-e-manzil hī badal jaa.e to merā kyā qusūr

rāstoñ se pūchh kar dekho kahīñ Thahrā huuñ maiñ

der tak hasrat se dekhegī use shām-e-safar

jis zamīñ par naqsh apne chhoḌ kar guzrā huuñ maiñ

chupke chupke raat bhar kahtā hai 'aḳhtar' mujh se dil

bastiyāñ ābād haiñ mujh se magar sahrā huuñ maiñ

kaise samjhaun nasim-e-subh tujh ko kya hun main

phul ke sae mein murjhaya hua patta hun main

KHak ka zarra bhi koi tere daman mein na tha

qadr kar ai zindagi TuTa hua tara hun main

har dhaDakte dil se an-jaana sa rishta hai mera

aag daman mein kisi ke bhi lage jalta hun main

apni tariki sameTe puchhti hai mujh se raat

kaun si hai subh jis ko DhunDhne nikla hun main

mujh ko samjhae to koi raazdar-e-kaenat

mujh mein hai aabaad ye duniya ki KHud apna hun main

zindagi TuTe hue KHwabon mein guzri hai to kya!

aaj bhi ek KHwab aankhon mein liye baiTha hun main

samt-e-manzil hi badal jae to mera kya qusur

raston se puchh kar dekho kahin Thahra hun main

der tak hasrat se dekhegi use sham-e-safar

jis zamin par naqsh apne chhoD kar guzra hun main

chupke chupke raat bhar kahta hai 'aKHtar' mujh se dil

bastiyan aabaad hain mujh se magar sahra hun main