kaisi diwangi kaisa aawara-pan baT gai raushni anjuman-anjuman

kaisī dīvāngī kaisā āvāra-pan baT ga.ī raushnī anjuman-anjuman

raqs kartī rahī tīrgī mere ghar sham.a jaltī rahī anjuman-anjuman

ho pareshān tere nagar aa gayā har galī ghūmtā tere ghar aa gayā

chāñd jaltā rahā tere dar par khaḌā chāñdnī gir paḌī anjuman-anjuman

rah ga.ī kāTtī mujh ko tanhā.iyāñ mahfil-e-rang haiñ sirf parchhā.iyāñ

bin tire bekalī bin tire bekasī kaisī bechārgī anjuman-anjuman

TūTtā phūTtā dard kā maarā dil phir bhī siine meñ hai jaise sayyāra dil

ham mile kho ga.e ham judā ho ga.e kho ga.ī har ḳhushī anjuman-anjuman

do nigāhoñ ke ye jaam bharte rahe jaam par jaam ke daur chalte rahe

ro.e kitnā magar pyaas itnī baḌhī aisī thī tishnagī anjuman-anjuman

harf kāġhaz ke panne palaTte rahe sher aa aa ke lab pe bhaTakte rahe

ishq kahtā gayā dard likhtā gayā fikr-o-fan shā.irī anjuman-anjuman

jiite jī haal jo be-davā kā huā haal 'ulfat' vo terī duā kā huā

maut phirtī rahī ham ko sar par liye zindagī-zindagī anjuman-anjuman

kaisi diwangi kaisa aawara-pan baT gai raushni anjuman-anjuman

raqs karti rahi tirgi mere ghar shama jalti rahi anjuman-anjuman

ho pareshan tere nagar aa gaya har gali ghumta tere ghar aa gaya

chand jalta raha tere dar par khaDa chandni gir paDi anjuman-anjuman

rah gai kaTti mujh ko tanhaiyan mahfil-e-rang hain sirf parchhaiyan

bin tere bekali bin tere bekasi kaisi bechaargi anjuman-anjuman

TuTta phuTta dard ka mara dil phir bhi sine mein hai jaise sayyara dil

hum mile kho gae hum juda ho gae kho gai har KHushi anjuman-anjuman

do nigahon ke ye jam bharte rahe jam par jam ke daur chalte rahe

roe kitna magar pyas itni baDhi aisi thi tishnagi anjuman-anjuman

harf kaghaz ke panne palaTte rahe sher aa aa ke lab pe bhaTakte rahe

ishq kahta gaya dard likhta gaya fikr-o-fan shairi anjuman-anjuman

jite ji haal jo be-dawa ka hua haal 'ulfat' wo teri dua ka hua

maut phirti rahi hum ko sar par liye zindagi-zindagi anjuman-anjuman