kaisi halchal mein guzari maine

kaisī halchal meñ guzārī maiñ ne

phir bhī kī yaad tumhārī maiñ ne

terī ulfat meñ subuk-gām rahā

ḳhuub kī dasht-ġhubārī maiñ ne

saare ahbāb falak-raft hue

chhoḌ dī kaisī savārī maiñ ne

ban ga.e us ke fasāne kitne

sang uThāyā thā jo bhārī maiñ ne

kis kī yādoñ kā taḳhayyul mahkā

kis kī tasvīr utārī maiñ ne

koī batlā.e sar-e-manzil-e-shauq

rok lī kis kī savārī maiñ ne

tirī zulfoñ kā parastār huuñ maiñ

chhoḌ dī bād-e-bahārī maiñ ne

sang-e-ehsās ziyā-fām thā par

raushnī us kī nikhārī maiñ ne

mai-e-irfāñ thī ġhazal meñ 'ajmal'

ik parī us meñ utārī maiñ ne

kaisi halchal mein guzari main ne

phir bhi ki yaad tumhaari main ne

teri ulfat mein subuk-gam raha

KHub ki dasht-ghubari main ne

sare ahbab falak-raft hue

chhoD di kaisi sawari main ne

ban gae us ke fasane kitne

sang uThaya tha jo bhaari main ne

kis ki yaadon ka taKHayyul mahka

kis ki taswir utari main ne

koi batlae sar-e-manzil-e-shauq

rok li kis ki sawari main ne

teri zulfon ka parastar hun main

chhoD di baad-e-bahaari main ne

sang-e-ehsas ziya-fam tha par

raushni us ki nikhaari main ne

mai-e-irfan thi ghazal mein 'ajmal'

ek pari us mein utari main ne