kal aalam-e-KHayal mein dekha hawa ka raqs

kal ālam-e-ḳhayāl meñ dekhā havā kā raqs

barg-e-chaman ke saaz pe bād-e-sabā kā raqs

har samt bāzgasht mirī gūñjtī rahī

kohsār dekhte rahe merī sadā kā raqs

sun dhaḌkanoñ kī taal pe hotā hai kis tarah

ehsās ke qafas meñ dil-e-be-navā kā raqs

qarnoñ pe hai muhīt ġham-e-zāt-o-kā.enāt

sadiyoñ se ho rahā hai ye harf-e-vafā kā raqs

dil meñ dhamāl Dāltī haiñ aise ḳhvāhisheñ

jaise dahaktī aag meñ mauj-e-havā kā raqs

shāyad kabhī ḳhudā ko pasand aa nahīñ sakā

terī duā kā raqs na merī duā kā raqs

kal aalam-e-KHayal mein dekha hawa ka raqs

barg-e-chaman ke saz pe baad-e-saba ka raqs

har samt bazgasht meri gunjti rahi

kohsar dekhte rahe meri sada ka raqs

sun dhaDkanon ki tal pe hota hai kis tarah

ehsas ke qafas mein dil-e-be-nawa ka raqs

qarnon pe hai muhit gham-e-zat-o-kaenat

sadiyon se ho raha hai ye harf-e-wafa ka raqs

dil mein dhamal Dalti hain aise KHwahishen

jaise dahakti aag mein mauj-e-hawa ka raqs

shayad kabhi KHuda ko pasand aa nahin saka

teri dua ka raqs na meri dua ka raqs