kal bichhaDte hue zabt ka marhala is qadar talKH tha kya bataun aKHi

kal bichhaḌte hue zabt kā marhala is qadar talḳh thā kyā batā.ūñ aḳhī

merī ḳhāmoshiyoñ kī chaTānoñ ke andar thī merī sadā kyā batā.ūñ aḳhī

tū abhī raushnī aur añdhere meñ kyā farq hai is se bilkul bhī vāqif nahīñ

ek bujhte diye kī jo majbūr kirnoñ ne mujh se kahā kyā batā.ūñ aḳhī

vaqt ke canvas par banī is barahna sī be-rañg tasvīr meñ dekh lo

un dinoñ is ḳhayāloñ ke jangal meñ mere sivā kaun thā kyā batā.ūñ aḳhī

shā.erī aur mohabbat ke sab zāviye aise logoñ kī āñkhoñ pe khulte nahīñ

umr-bhar jin ke hisse meñ aatā nahīñ lams kā zā.iqa kyā batā.ūñ aḳhī

ḳhvāb peḌoñ kī sūrat haiñ aur ye kabhī ḳhushk-o-banjar zamīnoñ meñ ugte nahīñ

is liye niiñd se bhāgne vāloñ ko ḳhvāb kā falsafa kyā batā.ūñ aḳhī

kal bichhaDte hue zabt ka marhala is qadar talKH tha kya bataun aKHi

meri KHamoshiyon ki chaTanon ke andar thi meri sada kya bataun aKHi

tu abhi raushni aur andhere mein kya farq hai is se bilkul bhi waqif nahin

ek bujhte diye ki jo majbur kirnon ne mujh se kaha kya bataun aKHi

waqt ke canwas par bani is barahna si be-rang taswir mein dekh lo

un dinon is KHayalon ke jangal mein mere siwa kaun tha kya bataun aKHi

shaeri aur mohabbat ke sab zawiye aise logon ki aankhon pe khulte nahin

umr-bhar jin ke hisse mein aata nahin lams ka zaiqa kya bataun aKHi

KHwab peDon ki surat hain aur ye kabhi KHushk-o-banjar zaminon mein ugte nahin

is liye nind se bhagne walon ko KHwab ka falsafa kya bataun aKHi