kal jo ghaflat mein paDe the aaj wo hushiyar hain

kal jo ġhaflat meñ paḌe the aaj vo hushiyār haiñ

ek ham hī so rahe haiñ aur sab bedār haiñ

jā.eza leñ vaqt kā māhaul pe rakkheñ nazar

fikr-o-fan se kaam leñ ham aaj ke fankār haiñ

chand sikkoñ ke evaz jo bech dete haiñ zamīr

aise hī kam-zarf duniyā meñ zalīl-o-ḳhvār haiñ

ye to mustaqbil batā.egā tumheñ ahl-e-chaman

tum chaman-zāroñ ke vāris ho ki ham haqdār haiñ

kaam le hosh-o-ḳhirad se ai amīr-e-kārvāñ

har qadam par rāhzan haiñ manzileñ dushvār haiñ

vaqt ke jhūTe ḳhudā ham ko jhukā sakte nahīñ

azm-e-rāsiḳh kī qasam ham bhī bahut ḳhud.dār haiñ

tum ne 'zākir' us se jab tark-e-ta.alluq kar liyā

ye shikāyat bhī abas hai ye gile bekār haiñ

kal jo ghaflat mein paDe the aaj wo hushiyar hain

ek hum hi so rahe hain aur sab bedar hain

jaeza len waqt ka mahaul pe rakkhen nazar

fikr-o-fan se kaam len hum aaj ke fankar hain

chand sikkon ke ewaz jo bech dete hain zamir

aise hi kam-zarf duniya mein zalil-o-KHwar hain

ye to mustaqbil bataega tumhein ahl-e-chaman

tum chaman-zaron ke waris ho ki hum haqdar hain

kaam le hosh-o-KHirad se ai amir-e-karwan

har qadam par rahzan hain manzilen dushwar hain

waqt ke jhuTe KHuda hum ko jhuka sakte nahin

azm-e-rasiKH ki qasam hum bhi bahut KHuddar hain

tum ne 'zakir' us se jab tark-e-talluq kar liya

ye shikayat bhi abas hai ye gile bekar hain