kal jo ruKH-e-araq-fishan yar ne Tuk dikha diya

kal jo ruḳh-e-araq-fishāñ yaar ne Tuk dikhā diyā

paanī chhiḌak ke ḳhvāb se fitne ko phir jagā diyā

us ke sharār-e-husn ne sho.ala jo ik dikhā diyā

tuur ko sar se paañv tak phūñk diyā jalā diyā

phir ke nigāh chār-sū Thahrī usī ke rū-ba-rū

us ne to merī chashm ko qibla-numā banā diyā

merā aur us kā iḳhtilāt ho gayā misl-e-abr-o-barq

us ne mujhe rulā diyā maiñ ne use hañsā diyā

maiñ huuñ patañg kāġhzī Dor hai us ke haath meñ

chāhā idhar ghaTā diyā chāhā udhar baḌhā diyā

teshe kī kyā majāl thī ye jo tarāshe be-sutūñ

thā vo tamām dil kā zor jis ne pahāḌ Dhā diyā

guzre jo sū-e-ḳhānqāh vaañ bhī ba-shakl-e-jānmāz

ahl-e-salāh-o-zuhd ko farsh kiyā bichhā diyā

nikle jo rāh-e-dair se ik hī nigāh-e-mast meñ

gabr kā sabr kho diyā but ko bhī but banā diyā

shikva hamārā hai bajā muft-baroñ se kis liye

ham ne to apnā dil diyā ham ko kisī ne kyā diyā

sun ke hamāre haal kā yaar ne ik suḳhan 'nazīr'

hañs ke kahā ki bas jī bas tum ne to sar phirā diyā

kal jo ruKH-e-araq-fishan yar ne Tuk dikha diya

pani chhiDak ke KHwab se fitne ko phir jaga diya

us ke sharar-e-husn ne shoala jo ek dikha diya

tur ko sar se panw tak phunk diya jala diya

phir ke nigah chaar-su Thahri usi ke ru-ba-ru

us ne to meri chashm ko qibla-numa bana diya

mera aur us ka iKHtilat ho gaya misl-e-abr-o-barq

us ne mujhe rula diya main ne use hansa diya

main hun patang kaghzi Dor hai us ke hath mein

chaha idhar ghaTa diya chaha udhar baDha diya

teshe ki kya majal thi ye jo tarashe be-sutun

tha wo tamam dil ka zor jis ne pahaD Dha diya

guzre jo su-e-KHanqah wan bhi ba-shakl-e-jaanmaz

ahl-e-salah-o-zuhd ko farsh kiya bichha diya

nikle jo rah-e-dair se ek hi nigah-e-mast mein

gabr ka sabr kho diya but ko bhi but bana diya

shikwa hamara hai baja muft-baron se kis liye

hum ne to apna dil diya hum ko kisi ne kya diya

sun ke hamare haal ka yar ne ek suKHan 'nazir'

hans ke kaha ki bas ji bas tum ne to sar phira diya