kal nashat-e-qurb se mausam bahaar-andaza tha

kal nashāt-e-qurb se mausam bahār-andāza thā

kuchh havā bhī narm thī kuchh rañg-e-gul bhī taaza thā

thak ke sañg-e-rāh par baiThe to uTThe hī nahīñ

had se baḌh kar tez chalne kā yahī ḳhamyāza thā

ā.īna donoñ ke aage rakh diyā taqdīr ne

mere chehre par lahū thā rū-e-gul par ġhāza thā

mujh ko mallāhoñ ke gītoñ se mohabbat hai magar

raat sāhil par havā kā shor be-andāza thā

ab to kuchh dukh bhī nahīñ hai daaġh bhī jaatā rahā

kal isī dil meñ yahīñ ik zaḳhm thā aur taaza thā

go yaqīnī to nahīñ the mere taḳhmīne magar

jo tujhe pesh aayā us kā kuchh mujhe andāza thā

mere aurāq-e-pareshāñ dekhne vaale kabhī

maiñ kitāb-e-ishq thā aur dil mirā shīrāza thā

aañkh meñ us kī chamak thī par havasnākī bhī thī

rañg us ke ruḳh pe thā lekin rahīn-e-ġhāza thā

josh-e-girya mere rone kā ye shor-e-bāz-gasht

kuchh na thā ik kūcha gard-e-sabr kā āvāza thā

jaane andar kyā huā maiñ shor sun kar ai 'salīm'

us jagah pahuñchā to dekhā band vo darvāza thā

kal nashat-e-qurb se mausam bahaar-andaza tha

kuchh hawa bhi narm thi kuchh rang-e-gul bhi taza tha

thak ke sang-e-rah par baiThe to uTThe hi nahin

had se baDh kar tez chalne ka yahi KHamyaza tha

aaina donon ke aage rakh diya taqdir ne

mere chehre par lahu tha ru-e-gul par ghaza tha

mujh ko mallahon ke giton se mohabbat hai magar

raat sahil par hawa ka shor be-andaza tha

ab to kuchh dukh bhi nahin hai dagh bhi jata raha

kal isi dil mein yahin ek zaKHm tha aur taza tha

go yaqini to nahin the mere taKHmine magar

jo tujhe pesh aaya us ka kuchh mujhe andaza tha

mere auraq-e-pareshan dekhne wale kabhi

main kitab-e-ishq tha aur dil mera shiraaza tha

aankh mein us ki chamak thi par hawasnaki bhi thi

rang us ke ruKH pe tha lekin rahin-e-ghaza tha

josh-e-girya mere rone ka ye shor-e-baz-gasht

kuchh na tha ek kucha gard-e-sabr ka aawaza tha

jaane andar kya hua main shor sun kar ai 'salim'

us jagah pahuncha to dekha band wo darwaza tha