kal raat sehn-e-dil mein tha harjaiyon ka raqs

kal raat sehn-e-dil meñ thā harjā.iyoñ kā raqs

thī vahshatoñ kī thaap pachhal-pā.iyoñ kā raqs

manzūm ho rahī thī ḳhamoshī ba-faiz-e-hijr

thā zehn meñ hurūf kī parchhā.iyoñ kā raqs

us kī ḳhushī manā.ūñ yā afsos na karūñ

hai shohratoñ ke saaz pe rusvā.iyoñ kā raqs

ye vo zamāna hai nahīñ jis kī koī misāl

yaañ bhā.iyoñ ke qatl pe hai bhā.iyoñ kā raqs

shab bhar adā-e-husn ko Tuk dekhtā rahā

maiñ us ḳhirām-e-nāz kī añgḌā.iyoñ kā raqs

andar thā mere vasl kā bistar lagā huā

kamre meñ thak ke chuur thā tanhā.iyoñ kā raqs

maiñ mahv-e-guftugū thā tumhārī nazar ke saath

aur mere ird-gard thā bīnā.iyoñ kā raqs

kuchh baat thī jo bazm meñ tanhā khaḌā thā maiñ

hālāñki chār-sū thā shanāsā.iyoñ kā raqs

kal raat sehn-e-dil mein tha harjaiyon ka raqs

thi wahshaton ki thap pachhal-paiyon ka raqs

manzum ho rahi thi KHamoshi ba-faiz-e-hijr

tha zehn mein huruf ki parchhaiyon ka raqs

us ki KHushi manaun ya afsos na karun

hai shohraton ke saz pe ruswaiyon ka raqs

ye wo zamana hai nahin jis ki koi misal

yan bhaiyon ke qatl pe hai bhaiyon ka raqs

shab bhar ada-e-husn ko Tuk dekhta raha

main us KHiram-e-naz ki angDaiyon ka raqs

andar tha mere wasl ka bistar laga hua

kamre mein thak ke chur tha tanhaiyon ka raqs

main mahw-e-guftugu tha tumhaari nazar ke sath

aur mere ird-gard tha binaiyon ka raqs

kuchh baat thi jo bazm mein tanha khaDa tha main

haalanki chaar-su tha shanasaiyon ka raqs