kal sapna tha kal ke wade jhuTe the

kal sapnā thā kal ke va.ade jhūTe the

rang-birange saare jazbe jhūTe the

Dhaltā sūraj kitnā bebas lagtā thā

shaam ke manzar dhuul kī kohr meñ lipTe the

lamhe the ki purvā.ī sī chaltī thī

har ik pal kuchh zaḳhm se khilne lagte the

jin jin rastoñ se vo mujh meñ utrā thā

āñkhoñ meñ vo saare naqsh sulagte the

un hoñToñ ne jo kuchh bhī farmāyā thā

dil par vo alfāz vo lahje likhte the

jiine kā sarmāya bas kuchh ḳhvāb sarāb

aslī sukūñ par to kuchh saañp se baiThe the

ab un ke 'jāved' ishāre kyā socheñ

āñkhoñ ne bhī shāyad jhuuT hī bole the

kal sapna tha kal ke wade jhuTe the

rang-birange sare jazbe jhuTe the

Dhalta suraj kitna bebas lagta tha

sham ke manzar dhul ki kohr mein lipTe the

lamhe the ki purwai si chalti thi

har ek pal kuchh zaKHm se khilne lagte the

jin jin raston se wo mujh mein utra tha

aankhon mein wo sare naqsh sulagte the

un honTon ne jo kuchh bhi farmaya tha

dil par wo alfaz wo lahje likhte the

jine ka sarmaya bas kuchh KHwab sarab

asli sukun par to kuchh sanp se baiThe the

ab un ke 'jawed' ishaare kya sochen

aankhon ne bhi shayad jhuT hi bole the