kal tak jo intizar tha wo bhi nahin raha

kal tak jo intizār thā vo bhī nahīñ rahā

ik hī to merā yaar thā vo bhī nahīñ rahā

thoḌā bahut jo pyaar thā vo bhī nahīñ rahā

ik shaḳhs be-qarār thā vo bhī nahīñ rahā

jiine kī ek umiid thī vo bhī nahīñ rahī

jis dard se qarār thā vo bhī nahīñ rahā

aisī chalī havā.eñ ki sab kuchh bikhar gayā

ik peḌ sāya-dār thā vo bhī nahīñ rahā

afsāne kī siyāhī se sab kuchh badal diyā

ḳhvāboñ pe iḳhtiyār thā vo bhī nahīñ rahā

jo mausamoñ kī tarah badaltā thā rañgateñ

aur āmad-e-bahār thā vo bhī nahīñ rahā

hotā thā apne beach mohabbat kā len-den

barakat kā kārobār thā vo bhī nahīñ rahā

pyāsī bahut thī hasrateñ lo aaj mar ga.iiñ

bārish kā intizār thā vo bhī nahīñ rahā

'armān' vo ḳhayāl mirī jā.edād thā

is fikr meñ nikhār thā vo bhī nahīñ rahā

kal tak jo intizar tha wo bhi nahin raha

ek hi to mera yar tha wo bhi nahin raha

thoDa bahut jo pyar tha wo bhi nahin raha

ek shaKHs be-qarar tha wo bhi nahin raha

jine ki ek umid thi wo bhi nahin rahi

jis dard se qarar tha wo bhi nahin raha

aisi chali hawaen ki sab kuchh bikhar gaya

ek peD saya-dar tha wo bhi nahin raha

afsane ki siyahi se sab kuchh badal diya

KHwabon pe iKHtiyar tha wo bhi nahin raha

jo mausamon ki tarah badalta tha rangaten

aur aamad-e-bahaar tha wo bhi nahin raha

hota tha apne beach mohabbat ka len-den

barakat ka karobar tha wo bhi nahin raha

pyasi bahut thi hasraten lo aaj mar gain

barish ka intizar tha wo bhi nahin raha

'arman' wo KHayal meri jaedad tha

is fikr mein nikhaar tha wo bhi nahin raha