kal uske chehre ko humne jo aaftab likha

kal us ke chehre ko ham ne jo āftāb likhā

to us ne paḌh ke vo naama bahut itaab likhā

jabīñ ko mah jo likhā to kahā ho chīñ-ba-jabīñ

ye kaisī us kī samajh thī jo māhtāb likhā

chamakte dāñtoñ ko gauhar likhā to hañs ke kahā

sitāre uḌ ga.e the jo dur-e-ḳhush-āb likhā

likhā jo mushk-e-ḳhatā zulf ko to bal khā kar

kahā ḳhatā kī jo ye harf-e-nā-savāb likhā

gulāb araq ko likhā to ye bolā naak chaḌhā

use na itr mayassar thā jo gulāb likhā

jigar kabāb likhā apnā to kahā jal kar

bhalā jī kyā maiñ sharābī thā jo kabāb likhā

hisāb-e-shauq kā daftar likhā to jhuñjhlā kar

kahā maiñ kyā mutasaddi thā jo hisāb likhā

jo be-hisāb likhā ishtiyāq-e-dil to kahā

vo kis hisāb meñ hai ye bhī be-hisāb likhā

hue jo radd-o-badal aise kitne baar nazīr

to us ne ḳhat kā hamāre na phir javāb likhā

kal us ke chehre ko hum ne jo aaftab likha

to us ne paDh ke wo nama bahut itab likha

jabin ko mah jo likha to kaha ho chin-ba-jabin

ye kaisi us ki samajh thi jo mahtab likha

chamakte danton ko gauhar likha to hans ke kaha

sitare uD gae the jo dur-e-KHush-ab likha

likha jo mushk-e-KHata zulf ko to bal kha kar

kaha KHata ki jo ye harf-e-na-sawab likha

gulab araq ko likha to ye bola nak chaDha

use na itr mayassar tha jo gulab likha

jigar kabab likha apna to kaha jal kar

bhala ji kya main sharabi tha jo kabab likha

hisab-e-shauq ka daftar likha to jhunjhla kar

kaha main kya mutasaddi tha jo hisab likha

jo be-hisab likha ishtiyaq-e-dil to kaha

wo kis hisab mein hai ye bhi be-hisab likha

hue jo radd-o-badal aise kitne bar nazir

to us ne KHat ka hamare na phir jawab likha