kal uske nek banne ka imkan bhi to hai

kal us ke nek banñe kā imkān bhī to hai

mujrim zarūr hai magar insān bhī to hai

chehra hasīñ vo dushman-e-īmān bhī to hai

lekin nashāt-e-rūh kā sāmān bhī to hai

ġhurbat kī Thokaroñ meñ jo pal kar javāñ huā

tūfāñ ke rū-ba-rū vahī chaTTān bhī to hai

kal tak uThī thiiñ jis kī sharāfat pe uñgliyāñ

apne kiye pe aaj pashemān bhī to hai

huuñ apne dostoñ kī nigāhoñ meñ mohtaram

mujh ko milā ḳhulūs kā vardān bhī to hai

qurbat hai us kī vaj.h-e-qarār-o-sukūñ magar

us kā shabāb hashr kā sāmān bhī to hai

samjhā gayā hai jis ko sharāfat kā pāsdār

bātin meñ bad-shi.ār vo shaitān bhī to hai

qātil tū ghar pe kaise kahūñ maiñ burā bhalā

izzat-ma.āb hai mirā mehmān bhī to hai

'nayyar' junūn-e-shauq meñ rusvā huā to kyā

us kī alag samāj meñ pahchān bhī to hai

kal us ke nek banne ka imkan bhi to hai

mujrim zarur hai magar insan bhi to hai

chehra hasin wo dushman-e-iman bhi to hai

lekin nashat-e-ruh ka saman bhi to hai

ghurbat ki Thokaron mein jo pal kar jawan hua

tufan ke ru-ba-ru wahi chaTTan bhi to hai

kal tak uThi thin jis ki sharafat pe ungliyan

apne kiye pe aaj pasheman bhi to hai

hun apne doston ki nigahon mein mohtaram

mujh ko mila KHulus ka wardan bhi to hai

qurbat hai us ki wajh-e-qarar-o-sukun magar

us ka shabab hashr ka saman bhi to hai

samjha gaya hai jis ko sharafat ka pasdar

baatin mein bad-shiar wo shaitan bhi to hai

qatil tu ghar pe kaise kahun main bura bhala

izzat-maab hai mera mehman bhi to hai

'nayyar' junun-e-shauq mein ruswa hua to kya

us ki alag samaj mein pahchan bhi to hai