kaleja munh ko aata hai karen tum se bayan kyunkar

kaleja muñh ko aatā hai kareñ tum se bayāñ kyūñkar

na pūchho ham-safīro ham se chhūTā āshiyāñ kyūñkar

zarā dekheñ badal jaatā hai daur-e-āsmāñ kyūñkar

kisī ke haal par hotā hai koī meherbāñ kyūñkar

hameñ to ġham se itnī bhī nahīñ fursat ki ye socheñ

mohabbat meñ huā kartā hai koī shādmāñ kyūñkar

kisī par umr bhar kī kis tarah mashq-e-sitam tum ne

zarā socho to dil meñ aur loge imtihāñ kyūñkar

na ham hoñge na gulshan meñ hamārā āshiyāñ hogā

baneñgī bijliyāñ aa kar charāġh-e-āshiyāñ kyūñkar

uḌātā hai nishāna dil kā vo nāvak-fagan 'safdar'

nazākat dekhtī hai muñh ki khīñchtī hai kamāñ kyūñkar

kaleja munh ko aata hai karen tum se bayan kyunkar

na puchho ham-safiro hum se chhuTa aashiyan kyunkar

zara dekhen badal jata hai daur-e-asman kyunkar

kisi ke haal par hota hai koi meherban kyunkar

hamein to gham se itni bhi nahin fursat ki ye sochen

mohabbat mein hua karta hai koi shadman kyunkar

kisi par umr bhar ki kis tarah mashq-e-sitam tum ne

zara socho to dil mein aur loge imtihan kyunkar

na hum honge na gulshan mein hamara aashiyan hoga

banengi bijliyan aa kar charagh-e-ashiyan kyunkar

uData hai nishana dil ka wo nawak-fagan 'safdar'

nazakat dekhti hai munh ki khinchti hai kaman kyunkar