kali ko phulon ki zindagi ka shuur phir ek bar hoga

kalī ko phūloñ kī zindagī kā shu'ūr phir ek baar hogā

ḳhizāñ se paidā bahār kar le chaman ko ye iḳhtiyār hogā

zamāna pahlū badal rahā hai falak ke tevar batā rahe haiñ

harīf jis ko chhupā rahe the vo raaz ab āshkār hogā

sunā hai sahrā-nashīñ gulistāñ kī zindagī ko faroġh deñge

agar ye sach hai to ahl-e-gulshan ko bā’is-e-iftiḳhār hogā

adab se mai-ḳhvār sun rahe haiñ nigāh saaqī kī kah rahī hai

yahī purānā sharāb-ḳhāna hayāt-e-nau kā hisār hogā

nujūm kī anjuman meñ ahl-e-zamīñ kī hālat kā tazkira thā

bhar aa.ī shabnam kī aañkh bolā qamar use nāgavār hogā

ḳhizāñ ke manzar ko yaad kar ke hañsī uḌānā hañsī nahīñ hai

ḳhizāñ kā dāman junūñ ke hāthoñ bahār meñ tār-tār hogā

na.e chaman se nigāh-e-maġhrib ne phuul ġhairat ke chun liye haiñ

jo dil meñ gulchīñ ke chubh rahā hai purāne gulshan kā ḳhaar hogā

ġhalat hai aulād-e-ahl-e-dānish ko vo mazāq-e-nazar nahīñ hai

havā to hai sāzgār 'zaidī' magar koī intizār hogā

kali ko phulon ki zindagi ka shu'ur phir ek bar hoga

KHizan se paida bahaar kar le chaman ko ye iKHtiyar hoga

zamana pahlu badal raha hai falak ke tewar bata rahe hain

harif jis ko chhupa rahe the wo raaz ab aashkar hoga

suna hai sahra-nashin gulistan ki zindagi ko farogh denge

agar ye sach hai to ahl-e-gulshan ko ba’is-e-iftiKHar hoga

adab se mai-KHwar sun rahe hain nigah saqi ki kah rahi hai

yahi purana sharab-KHana hayat-e-nau ka hisar hoga

nujum ki anjuman mein ahl-e-zamin ki haalat ka tazkira tha

bhar aai shabnam ki aankh bola qamar use nagawar hoga

KHizan ke manzar ko yaad kar ke hansi uDana hansi nahin hai

KHizan ka daman junun ke hathon bahaar mein tar-tar hoga

nae chaman se nigah-e-maghrib ne phul ghairat ke chun liye hain

jo dil mein gulchin ke chubh raha hai purane gulshan ka KHar hoga

ghalat hai aulad-e-ahl-e-danish ko wo mazaq-e-nazar nahin hai

hawa to hai sazgar 'zaidi' magar koi intizar hoga