kaliyan talash karte hue Khaar tak gae

kaliyāñ talāsh karte hue ḳhaar tak ga.e

apne 'amal se manzil-e-dushvār tak ga.e

tārīkiyoñ se nuur kī dīvār tak ga.e

zulfeñ sañvārte hue ruḳhsār tak ga.e

nā chāhte hue bhī 'ayādat ke vāste

darvesh ban ke roz dar-e-yār tak ga.e

samjhī na kā.enāt-e-mohabbat ke pech-o-ḳham

pardā-nashīn log bhī bāzār tak ga.e

qātil se ye subūt miTāyā na jā sakā

qatre hamāre ḳhuun ke darbār tak ga.e

baisākhiyāñ tarāshne vāloñ se pūchhiye

kitnoñ ke ghar ujaaḌ ke ashjār tak ga.e

aisā nahīñ ke maslahatan chup rahe sabhī

kuchh haq-parast log shahryār tak ga.e

masrūr ho gayā vo mirā sar utaar kar

qātil ke haath kab mirī dastār tak ga.e

jazba hamārā rattī barābar na kam huā

ye aur baat jang meñ ham haar tak ga.e

majnūñ kī kyā bisāt hai 'mehvar' ke sāmne

sahrā meñ bas ga.e to vo ham daar tak ga.e

kaliyan talash karte hue KHar tak gae

apne 'amal se manzil-e-dushwar tak gae

tarikiyon se nur ki diwar tak gae

zulfen sanwarte hue ruKHsar tak gae

na chahte hue bhi 'ayaadat ke waste

darwesh ban ke roz dar-e-yar tak gae

samjhi na kaenat-e-mohabbat ke pech-o-KHam

parda-nashin log bhi bazar tak gae

qatil se ye subut miTaya na ja saka

qatre hamare KHun ke darbar tak gae

baisakhiyan tarashne walon se puchhiye

kitnon ke ghar ujaD ke ashjar tak gae

aisa nahin ke maslahatan chup rahe sabhi

kuchh haq-parast log shahryar tak gae

masrur ho gaya wo mera sar utar kar

qatil ke hath kab meri dastar tak gae

jazba hamara ratti barabar na kam hua

ye aur baat jang mein hum haar tak gae

majnun ki kya bisat hai 'mehwar' ke samne

sahra mein bas gae to wo hum dar tak gae