kaliyon ki chaTak gul ki hansi aur ziyaada

kaliyoñ kī chaTak gul kī hañsī aur ziyāda

aa.e tere hisse meñ ḳhushī aur ziyāda

aa jaa.e in āñkhoñ meñ namī aur ziyāda

ho jaa.e mire dil kī lagī aur ziyāda

kuchh dil kī taḌap baḌh ga.ī manzil pe pahuñch kar

kuchh ruuh bhī betāb huī aur ziyāda

saaqī ne jo maḳhmūr nigāhoñ se navāzā

sahbā mire sāġhar meñ Dhalī aur ziyāda

phir jaag uThī hai mire ehsās kī duniyā

phir ġham kī havā chalne lagī aur ziyāda

palkoñ pe shab-e-ġham jo machalne lage aañsū

jazbāt kī tafsīr huī aur ziyāda

mahke jo tamannāoñ ke gul bazm-e-vafā meñ

ḳhushbu-e-vafā phail ga.ī aur ziyāda

īsār-o-mohabbat ke nishānāt jo ubhre

kirdār kī ta.amīr huī aur ziyāda

is daur ke insān meñ iḳhlās-o-vafā kī

hone lagī mahsūs kamī aur ziyāda

chhā jā.egā armānoñ kī duniyā meñ añdherā

ḳhvāboñ kī agar sham.a jalī aur ziyāda

ai sāqi-e-mahfil tire paiġhām-e-nazar se

ho silsila-e-bāda-kashī aur ziyāda

behtar hai ki mil jaa.e kisī peḌ kā saaya

kyā hogā agar dhuup paḌī aur ziyāda

jab dil ko 'nigār' un ke tasavvur ne pukārā

rāhat kī kiran mujh ko milī aur ziyāda

kaliyon ki chaTak gul ki hansi aur ziyaada

aae tere hisse mein KHushi aur ziyaada

aa jae in aankhon mein nami aur ziyaada

ho jae mere dil ki lagi aur ziyaada

kuchh dil ki taDap baDh gai manzil pe pahunch kar

kuchh ruh bhi betab hui aur ziyaada

saqi ne jo maKHmur nigahon se nawaza

sahba mere saghar mein Dhali aur ziyaada

phir jag uThi hai mere ehsas ki duniya

phir gham ki hawa chalne lagi aur ziyaada

palkon pe shab-e-gham jo machalne lage aansu

jazbaat ki tafsir hui aur ziyaada

mahke jo tamannaon ke gul bazm-e-wafa mein

KHushbu-e-wafa phail gai aur ziyaada

isar-o-mohabbat ke nishanat jo ubhre

kirdar ki tamir hui aur ziyaada

is daur ke insan mein iKHlas-o-wafa ki

hone lagi mahsus kami aur ziyaada

chha jaega armanon ki duniya mein andhera

KHwabon ki agar shama jali aur ziyaada

ai saqi-e-mahfil tere paigham-e-nazar se

ho silsila-e-baada-kashi aur ziyaada

behtar hai ki mil jae kisi peD ka saya

kya hoga agar dhup paDi aur ziyaada

jab dil ko 'nigar' un ke tasawwur ne pukara

rahat ki kiran mujh ko mili aur ziyaada