kaliyon ki parwarish ka sila pa rahe hain hum

kaliyoñ kī parvarish kā sila pā rahe haiñ ham

yaaro bharī-bahār meñ murjhā rahe haiñ ham

tere sivā nahīñ hai koī lams-āshnā

bād-e-sabā ko chhūne se ghabrā rahe haiñ ham

jab rahnumā-e-shauq tū hī tū hai chār-sū

phir kaun sochtā hai kidhar jā rahe haiñ ham

ik baar us ne ham ko pukārā thā naam se

muddat huī par aaj bhī itrā rahe haiñ ham

har-dil-azīz yūñhī achānak nahīñ hue

barsoñ isī dayār meñ rusvā rahe haiñ ham

jis din se tere vāda-e-fardā pe shak huā

us din se apne aap ko jhuTlā rahe haiñ ham

'kāshif' ye baat koī na jaane ḳhudā kare

kyoñ itne be-qarār nazar aa rahe haiñ ham

kaliyon ki parwarish ka sila pa rahe hain hum

yaro bhari-bahaar mein murjha rahe hain hum

tere siwa nahin hai koi lams-ashna

baad-e-saba ko chhune se ghabra rahe hain hum

jab rahnuma-e-shauq tu hi tu hai chaar-su

phir kaun sochta hai kidhar ja rahe hain hum

ek bar us ne hum ko pukara tha nam se

muddat hui par aaj bhi itra rahe hain hum

har-dil-aziz yunhi achanak nahin hue

barson isi dayar mein ruswa rahe hain hum

jis din se tere wada-e-farda pe shak hua

us din se apne aap ko jhuTla rahe hain hum

'kashif' ye baat koi na jaane KHuda kare

kyon itne be-qarar nazar aa rahe hain hum