kam-az-kam is qadar to aadmi hushiyar ho jae

kam-az-kam is qadar to aadmī hushiyār ho jaa.e

ki jab duniyā na aa.e raas to dīñ-dār ho jaa.e

kabhī chheḌā to kar mizrāb-e-ġham se sāz-e-hastī ko

nashāt-e-zindagī hai dil agar bedār ho jaa.e

bahāreñ zindagī kī yuuñ mirī qismat meñ likkhī haiñ

ki maiñ jis phuul ko dāman meñ rakkhūñ ḳhaar ho jaa.e

kabhī ai āftāb aisī bhī koī sub.h paidā kar

sadā nāqūs kī sun kar haram bedār ho jaa.e

muqaddar kī ḳhushī is bazm meñ 'bismil' na ġham koī

magar jis tarh kī jis par nigāh-e-yār ho jaa.e

kam-az-kam is qadar to aadmi hushiyar ho jae

ki jab duniya na aae ras to din-dar ho jae

kabhi chheDa to kar mizrab-e-gham se saz-e-hasti ko

nashat-e-zindagi hai dil agar bedar ho jae

bahaaren zindagi ki yun meri qismat mein likkhi hain

ki main jis phul ko daman mein rakkhun KHar ho jae

kabhi ai aaftab aisi bhi koi subh paida kar

sada naqus ki sun kar haram bedar ho jae

muqaddar ki KHushi is bazm mein 'bismil' na gham koi

magar jis tarh ki jis par nigah-e-yar ho jae