kam se kam apna bharam to nahin khoya hota

kam se kam apnā bharam to nahīñ khoyā hotā

dil ko ronā thā to tanhā.ī meñ royā hotā

sub.h se sub.h talak jāgte hī umr kaTī

ek shab hī sahī bhar niiñd to soyā hotā

DhūñDhnā thā mire dil ko to kabhī palkoñ se

mere ashkoñ ke samundar ko biloyā hotā

dekhnā thā ki nazar chubhtī hai kaise to kabhī

is ke paikar meñ nigāhoñ ko guḌoyā hotā

jab yaqīñ us ko na paane kā huā to jaanā

yahī behtar thā ki pā kar use khoyā hotā

na milā koī bhī ġham bāñTne vaalā varna

apnā bojh apne hī kāñdhoñ pe na Dhoyā hotā

us ko puujā na kabhī jis ko tarāshā 'āzar'

naam is tarah to apnā na Duboyā hotā

kam se kam apna bharam to nahin khoya hota

dil ko rona tha to tanhai mein roya hota

subh se subh talak jagte hi umr kaTi

ek shab hi sahi bhar nind to soya hota

DhunDhna tha mere dil ko to kabhi palkon se

mere ashkon ke samundar ko biloya hota

dekhna tha ki nazar chubhti hai kaise to kabhi

is ke paikar mein nigahon ko guDoya hota

jab yaqin us ko na pane ka hua to jaana

yahi behtar tha ki pa kar use khoya hota

na mila koi bhi gham banTne wala warna

apna bojh apne hi kandhon pe na Dhoya hota

us ko puja na kabhi jis ko tarasha 'azar'

nam is tarah to apna na Duboya hota