kam ulajhti hai charaghon se hawa mere baad

kam ulajhtī hai charāġhoñ se havā mere ba.ad

shahr meñ shahr kā mausam na rahā mere ba.ad

maiñ ne jal kar na diyā maslahat-e-vaqt kā saath

kyā ḳhabar kaun jalā kaun bujhā mere ba.ad

sach kī ḳhātir sar-e-sholā bhī zabāñ rakh detā

baat ye hai koī mujh sā na rahā mere ba.ad

Dūbnā thā so maiñ ik mauj meñ pas Duub gayā

aur dariyā thā ki bahtā hī rahā mere ba.ad

phir koī shām-e-shafaq-dīdā bhī utrī ki nahīñ

merī tanhā.ī kā kyā rañg huā mere ba.ad

aur kyā hashr thā is anjuman-afrozī kā

bas yahī thā ki dhuāñ aur baḌhā mere ba.ad

yuuñ maiñ āsūda-e-manzil huuñ ki ab gard-e-safar

chūmtī hai mirā naqsh-e-kaf-e-pā mere ba.ad

kyā burā vaqt paḌā shahr-e-vafā par 'mahshar'

mujh ko hī DhūñDtī hai merī vafā mere ba.ad

kam ulajhti hai charaghon se hawa mere baad

shahr mein shahr ka mausam na raha mere baad

main ne jal kar na diya maslahat-e-waqt ka sath

kya KHabar kaun jala kaun bujha mere baad

sach ki KHatir sar-e-shola bhi zaban rakh deta

baat ye hai koi mujh sa na raha mere baad

Dubna tha so main ek mauj mein pas Dub gaya

aur dariya tha ki bahta hi raha mere baad

phir koi sham-e-shafaq-dida bhi utri ki nahin

meri tanhai ka kya rang hua mere baad

aur kya hashr tha is anjuman-afrozi ka

bas yahi tha ki dhuan aur baDha mere baad

yun main aasuda-e-manzil hun ki ab gard-e-safar

chumti hai mera naqsh-e-kaf-e-pa mere baad

kya bura waqt paDa shahr-e-wafa par 'mahshar'

mujh ko hi DhunDti hai meri wafa mere baad