kamal-e-husn ka jab bhi KHayal aaya hai

kamāl-e-husn kā jab bhī ḳhayāl aayā hai

misāl-e-sher tirā naam dil pe utrā hai

maiñ apne aap ko dekhūñ to kis tarah dekhūñ

ki mere gird mirī zaat hī kā parda hai

maiñ falsafī na payambar ki raah batlā.ūñ

har ek shaḳhs mujhī se savāl kartā hai

ye sach hai maiñ bhī taġhayyur kī zad se bach na sakā

savāl ye hai ki tū bhī to kitnā badlā hai

tire ḳhulūs kī chādar simaT ga.ī shāyad

mirā vajūd mujhe ajnabī sā lagtā hai

abhī to hālat-e-dil kā sudhār hai mushkil

abhī to terī judā.ī kā zaḳhm taaza hai

'azīz' apne tazādāt hī miTā Daalo

ye kaun pūchh rahā hai zamāna kaisā hai

kamal-e-husn ka jab bhi KHayal aaya hai

misal-e-sher tera nam dil pe utra hai

main apne aap ko dekhun to kis tarah dekhun

ki mere gird meri zat hi ka parda hai

main falsafi na payambar ki rah batlaun

har ek shaKHs mujhi se sawal karta hai

ye sach hai main bhi taghayyur ki zad se bach na saka

sawal ye hai ki tu bhi to kitna badla hai

tere KHulus ki chadar simaT gai shayad

mera wajud mujhe ajnabi sa lagta hai

abhi to haalat-e-dil ka sudhaar hai mushkil

abhi to teri judai ka zaKHm taza hai

'aziz' apne tazadat hi miTa Dalo

ye kaun puchh raha hai zamana kaisa hai