kamal fan mein hunar guftugu mein baqi hai

kamāl fan meñ hunar guftugū meñ baaqī hai

suḳhan kā ramz abhī lakhna.ū meñ baaqī hai

abhī na hogā zamāne meñ zulmatoñ kā zuhūr

abhī to raushnī mere lahū meñ baaqī hai

tumhāre jaam haiñ ḳhālī magar sharāb-e-suḳhan

hanūz thoḌī sī mere subū meñ baaqī hai

ik aur zulm ke lashkar ko zer honā hai

ik aur jang kamān-o-gulū meñ baaqī hai

isī liye to ye vīrāniyāñ mahaktī haiñ

koī ġhazāl abhī dasht-e-hū meñ baaqī hai

thamā nahīñ hai mire zaḳhm kā lahū ab tak

abhī to kaam bahut sā rafū meñ baaqī hai

na tere haath meñ dūñgā maiñ apnā haath kabhī

ki ab bhī kaj-kulahī merī ḳhū meñ baaqī hai

kamal fan mein hunar guftugu mein baqi hai

suKHan ka ramz abhi lakhnau mein baqi hai

abhi na hoga zamane mein zulmaton ka zuhur

abhi to raushni mere lahu mein baqi hai

tumhaare jam hain KHali magar sharab-e-suKHan

hanuz thoDi si mere subu mein baqi hai

ek aur zulm ke lashkar ko zer hona hai

ek aur jang kaman-o-gulu mein baqi hai

isi liye to ye viraniyan mahakti hain

koi ghazal abhi dasht-e-hu mein baqi hai

thama nahin hai mere zaKHm ka lahu ab tak

abhi to kaam bahut sa rafu mein baqi hai

na tere hath mein dunga main apna hath kabhi

ki ab bhi kaj-kulahi meri KHu mein baqi hai