kamal ye hai ki jo bhi hua kamal hua

kamāl ye hai ki jo bhī huā kamāl huā

sulūk aap kā har ik se hasb-e-hāl huā

na shab ko chain na din ko qarār miltā hai

ye zindagī na huī ḳhvāhishoñ kā jaal huā

kuchh aise log bhī tārīḳh kā havāla haiñ

uruuj un ke liye bā.is-e-zavāl huā

batā.ūñ kyā ki chaman se vo jab huā ruḳhsat

phir us ke baa'd ḳhizāoñ kā jo dhamāl huā

bichhaḌne vaale agar ho sake to lauT aao

use kaheñge agar rābta bahāl huā

misāl aur nahīñ hai ba-juz nabī-akram

hai ik vahī jo zamāne meñ be-misāl huā

ḳhushī ḳhushī se jiyā 'nāz' terī duniyā meñ

vagarna sab ko pata hai jo us kā haal huā

kamal ye hai ki jo bhi hua kamal hua

suluk aap ka har ek se hasb-e-haal hua

na shab ko chain na din ko qarar milta hai

ye zindagi na hui KHwahishon ka jal hua

kuchh aise log bhi tariKH ka hawala hain

uruj un ke liye bais-e-zawal hua

bataun kya ki chaman se wo jab hua ruKHsat

phir us ke ba'd KHizaon ka jo dhamal hua

bichhaDne wale agar ho sake to lauT aao

use kahenge agar rabta bahaal hua

misal aur nahin hai ba-juz nabi-akram

hai ek wahi jo zamane mein be-misal hua

KHushi KHushi se jiya 'naz' teri duniya mein

wagarna sab ko pata hai jo us ka haal hua