kaman saunp ke dushman ko apne lashkar ki

kamān sauñp ke dushman ko apne lashkar kī

kahā ki fat.h-o-zafar baat hai muqaddar kī

bulāvā laa.ī havā-e-bahisht phir ik baar

tuyūr jāñch karo apne apne shahpar kī

chalo rakh aa.eñ vahāñ ham bhī apne sar kā gulāb

sunā hai bahutoñ ne us kī galī mo.attar kī

pata chalā ki vahī hai nisāb se bāhar

mashaqqatoñ se jo maiñ ne kitāb azbar kī

ba-juz havāla-e-sad-zaḳhm-e-be-nishāñ kyā hai

ik aarzū ki jo dil se nikāl bāhar kī

pare hai sūrat-e-ḳhūbāñ talāsh-e-ma.anī se

mile na aab bhī kholeñ girah jo gauhar kī

hai muntazir pas-e-darvāza-fanā shāyad

jo ek bose meñ chhīne takān din bhar kī

kaman saunp ke dushman ko apne lashkar ki

kaha ki fath-o-zafar baat hai muqaddar ki

bulawa lai hawa-e-bahisht phir ek bar

tuyur jaanch karo apne apne shahpar ki

chalo rakh aaen wahan hum bhi apne sar ka gulab

suna hai bahuton ne us ki gali moattar ki

pata chala ki wahi hai nisab se bahar

mashaqqaton se jo main ne kitab azbar ki

ba-juz hawala-e-sad-zaKHm-e-be-nishan kya hai

ek aarzu ki jo dil se nikal bahar ki

pare hai surat-e-KHuban talash-e-mani se

mile na aab bhi kholen girah jo gauhar ki

hai muntazir pas-e-darwaza-fana shayad

jo ek bose mein chhine takan din bhar ki