kaman uThao ki hain samne nishane bahut

kamāñ uThāo ki haiñ sāmne nishāne bahut

abhī to ḳhālī paḌe haiñ lahū ke ḳhāne bahut

vo dhuup thī ki huī jā rahī thī jism ke paar

agarche ham ne ghane saa.e sar pe taane bahut

abhī kuchh aur kā ehsās phir bhī zinda hai

navāh-e-jism ke asrār ham ne jaane bahut

ziyāda kuchh bhī nahīñ ek musht-e-ḳhāk se maiñ

zarā sī chiiz ko phailā diyā havā ne bahut

lagā huā huuñ udhar vaqt ko sameTne meñ

phisal rahe haiñ idhar haath se zamāne bahut

safar qayām se behtar nahīñ rahā ab ke

ki jā-ba-jā the mirī raah meñ Thikāne bahut

baḌī ajiib thī pichhlī ḳhamosh raat 'hasan'

mujhe rulāyā kisī daur kī sadā ne bahut

kaman uThao ki hain samne nishane bahut

abhi to KHali paDe hain lahu ke KHane bahut

wo dhup thi ki hui ja rahi thi jism ke par

agarche hum ne ghane sae sar pe tane bahut

abhi kuchh aur ka ehsas phir bhi zinda hai

nawah-e-jism ke asrar hum ne jaane bahut

ziyaada kuchh bhi nahin ek musht-e-KHak se main

zara si chiz ko phaila diya hawa ne bahut

laga hua hun udhar waqt ko sameTne mein

phisal rahe hain idhar hath se zamane bahut

safar qayam se behtar nahin raha ab ke

ki ja-ba-ja the meri rah mein Thikane bahut

baDi ajib thi pichhli KHamosh raat 'hasan'

mujhe rulaya kisi daur ki sada ne bahut