kamar kaso to masafat ki aabru rakhna

kamar kaso to masāfat kī aabrū rakhnā

jo chal paḌo to na manzil kī aarzū rakhnā

bikhar rahā hai sabhī kuchh agarche duniyā meñ

hayāt-e-nau kī magar phir bhī justujū rakhnā

jahāñ meñ log faqat zindagī nibhāte haiñ

baḌā kamāl hai jiine ko ḳhūb-rū rakhnā

agar nigāh-o-nazar meñ ho rahmat-e-mutlaq

jhukā.e sar mire maulā ke rū-ba-rū rakhnā

vazāhatoñ ke liye baar baar jaanā ho

isī ḳhayāl se mub.ham sī guftugū rakhnā

ḳhizāñ ke baad chaman meñ bahār aane par

ravish-ravish vahī afsāna-e-numū rakhnā

savāl ziist kā dushvār hai bahut 'ādil'

ki aarzū nahīñ rakhnā yā aarzū rakhnā

kamar kaso to masafat ki aabru rakhna

jo chal paDo to na manzil ki aarzu rakhna

bikhar raha hai sabhi kuchh agarche duniya mein

hayat-e-nau ki magar phir bhi justuju rakhna

jahan mein log faqat zindagi nibhate hain

baDa kamal hai jine ko KHub-ru rakhna

agar nigah-o-nazar mein ho rahmat-e-mutlaq

jhukae sar mere maula ke ru-ba-ru rakhna

wazahaton ke liye bar bar jaana ho

isi KHayal se mubham si guftugu rakhna

KHizan ke baad chaman mein bahaar aane par

rawish-rawish wahi afsana-e-numu rakhna

sawal zist ka dushwar hai bahut 'adil'

ki aarzu nahin rakhna ya aarzu rakhna