kamar uski nahin aati nazar tak

kamar us kī nahīñ aatī nazar tak

nazar apnī nahīñ jaatī kamar tak

kamān abrū kī ḳham hone na paa.ī

ki pahuñchā tiir mizhgāñ kā jigar tak

rahā karte ho ġhairoñ ke makāñ meñ

kabhī aate to is bande ke ghar tak

kidhar jā.ūñ tirī mahfil se bāhar

ba-rang-e-sham.a go kaT jaa.e sar tak

koī hamdam na thā furqat kī shab meñ

faqat ik sham' royā kī sahar tak

kisī kī ḳhair-o-shar se kyā hameñ kaam

nahīñ rakhte ham apnī hī ḳhabar tak

kuchh aisī hai tire 'āshiq kī hālat

ki hosh aatā nahīñ do-do pahar tak

kiyā sayyād-e-zālim ne giraftār

nahīñ nikle the 'bāqī' bāl-o-par tak

kamar us ki nahin aati nazar tak

nazar apni nahin jati kamar tak

kaman abru ki KHam hone na pai

ki pahuncha tir mizhgan ka jigar tak

raha karte ho ghairon ke makan mein

kabhi aate to is bande ke ghar tak

kidhar jaun teri mahfil se bahar

ba-rang-e-shama go kaT jae sar tak

koi hamdam na tha furqat ki shab mein

faqat ek sham' roya ki sahar tak

kisi ki KHair-o-shar se kya hamein kaam

nahin rakhte hum apni hi KHabar tak

kuchh aisi hai tere 'ashiq ki haalat

ki hosh aata nahin do-do pahar tak

kiya sayyaad-e-zalim ne giraftar

nahin nikle the 'baqi' baal-o-par tak