kami aane na pae ai falak kuchh jaur-e-paiham mein

kamī aane na paa.e ai falak kuchh jaur-e-paiham meñ

bahut hai tāqat-e-bardāsht-e-ġham aaj bhī ham meñ

kamī aa.ī hai jab se tere mere rabt-e-bāham meñ

bhaTak kar rah ga.ī hai zindagī tārīkī-e-ġham meñ

huī haiñ anjuman meñ jab bhī us kāfir se chaar āñkheñ

kahī hai dāstān-e-ġham zabān-e-chashm-e-pur-nam meñ

uThā hī chāhtā hai ab janāza ārzūoñ kā

bujhā hī chāhtī hai shām-e-hastī ab koī dam meñ

yahī le de ke ab to rah gayā hai apnā sarmāya

jo aañsū dekhte haiñ aap merī chashm-e-pur-nam meñ

na vo mere na dil merā na adnā sī ḳhushī merī

ye merā hausla hai jī rahā huuñ aise aalam meñ

agar ai āsmāñ āh-o-fuġhāñ pe ham utar aa.eñ

badal jā.egī terī saarī duniyā bazm-e-mātam meñ

kahīñ nām-o-nishāñ tak mil na pā.egā masarrat kā

kahāñ tak saath mere de sakeñge jāda-e-ġham meñ

hayāt-e-muḳhtasar kī kyā kaheñ rūdād ham tujh se

ḳhulāsa ye ki guzrī hai pareshānī ke aalam meñ

kami aane na pae ai falak kuchh jaur-e-paiham mein

bahut hai taqat-e-bardasht-e-gham aaj bhi hum mein

kami aai hai jab se tere mere rabt-e-baham mein

bhaTak kar rah gai hai zindagi tariki-e-gham mein

hui hain anjuman mein jab bhi us kafir se chaar aankhen

kahi hai dastan-e-gham zaban-e-chashm-e-pur-nam mein

uTha hi chahta hai ab janaza aarzuon ka

bujha hi chahti hai sham-e-hasti ab koi dam mein

yahi le de ke ab to rah gaya hai apna sarmaya

jo aansu dekhte hain aap meri chashm-e-pur-nam mein

na wo mere na dil mera na adna si KHushi meri

ye mera hausla hai ji raha hun aise aalam mein

agar ai aasman aah-o-fughan pe hum utar aaen

badal jaegi teri sari duniya bazm-e-matam mein

kahin nam-o-nishan tak mil na paega masarrat ka

kahan tak sath mere de sakenge jada-e-gham mein

hayat-e-muKHtasar ki kya kahen rudad hum tujh se

KHulasa ye ki guzri hai pareshani ke aalam mein