kamre ki diwaron par aawezan jo taswiren hain

kamre kī dīvāroñ par āvezāñ jo tasvīreñ haiñ

ahd-e-guzishta ke ḳhvāboñ kī bikhrī huī tābīreñ haiñ

un ke ḳhat mahfūz haiñ ab tak mere ḳhutūt kī file meñ

qasmeñ vaade ahd o paimāñ pyaar bharī tahrīreñ haiñ

haath kī rekhā dekhne vaale merā haath bhī dekh zarā

bar aa.eñ ummīdeñ jin se aisī kahīñ lakīreñ haiñ

phir ye kis ne apnā kah kar dī hai sadā ik vahshī ko

zindāñ jis ke shor se larzā paañv paḌī zanjīreñ haiñ

'shams' kī hālat kā mat pūchho kuchh din se ye haal huā

har dam tanhā soch meñ baiThe dāman apnā chīreñ haiñ

kamre ki diwaron par aawezan jo taswiren hain

ahd-e-guzishta ke KHwabon ki bikhri hui tabiren hain

un ke KHat mahfuz hain ab tak mere KHutut ki file mein

qasmen wade ahd o paiman pyar bhari tahriren hain

hath ki rekha dekhne wale mera hath bhi dekh zara

bar aaen ummiden jin se aisi kahin lakiren hain

phir ye kis ne apna kah kar di hai sada ek wahshi ko

zindan jis ke shor se larza panw paDi zanjiren hain

'shams' ki haalat ka mat puchho kuchh din se ye haal hua

har dam tanha soch mein baiThe daman apna chiren hain