kapDe badal ke aae the aag mujhe laga gae

kapḌe badal ke aa.e the aag mujhe lagā ga.e

apne libās-e-surḳh kī mujh ko bhaḌak dikhā ga.e

baiThe adā se ek pal naaz se uTThe phir sambhal

pahlū churā ga.e nikal jī hī mirā jalā ga.e

rakhte hī dar se pā barūñ le ga.e sabr aur sukūñ

fitna-e-ḳhufta thā junūñ phir vo ise jagā ga.e

mujh ko to kaam kuchh na thā go ki vo the parī-laqā

bār-e-ḳhudā ye kyā huā kyuuñ vo mujhe satā ga.e

hai ye ajab tarah kī baat kyūñki na maliye apne haath

dil pe hamāre vo to raat chaukī sī ik biThā ga.e

sehr kiyā ki ToTkā aa.ī ye vaa.e kyā balā

haa.e ye jī kidhar chalā zor-e-adā dikhā ga.e

garche na the kuchh itne garm lek dikhā adā-e-sharm

dil ko lage jo narm narm saḳht qalaq lagā ga.e

āveñge phir bhī 'mus.hafī' dekhne mere ghar kabhī

aTkā hai ab to un se jī garche vo muñh chhupā ga.e

kapDe badal ke aae the aag mujhe laga gae

apne libas-e-surKH ki mujh ko bhaDak dikha gae

baiThe ada se ek pal naz se uTThe phir sambhal

pahlu chura gae nikal ji hi mera jala gae

rakhte hi dar se pa barun le gae sabr aur sukun

fitna-e-KHufta tha junun phir wo ise jaga gae

mujh ko to kaam kuchh na tha go ki wo the pari-laqa

bar-e-KHuda ye kya hua kyun wo mujhe sata gae

hai ye ajab tarah ki baat kyunki na maliye apne hath

dil pe hamare wo to raat chauki si ek biTha gae

sehr kiya ki ToTka aai ye wae kya bala

hae ye ji kidhar chala zor-e-ada dikha gae

garche na the kuchh itne garm lek dikha ada-e-sharm

dil ko lage jo narm narm saKHt qalaq laga gae

aawenge phir bhi 'mushafi' dekhne mere ghar kabhi

aTka hai ab to un se ji garche wo munh chhupa gae