kapDon mein makanon mein niwalon mein paDe hain

kapḌoñ meñ makānoñ meñ nivāloñ meñ paḌe haiñ

sab log inhīñ tiin ḳhayāloñ meñ paḌe haiñ

ham ahl-e-nazar band haiñ tārīk gharoñ meñ

andhe haiñ ki din-rāt ujāloñ meñ paḌe haiñ

rone se lakīreñ mire chehre pe banī haiñ

hañsne se gaḌhe aap ke gāloñ meñ paḌe haiñ

tum saath na the jab to faqat ashk dhare the

ab ḳhvāb bhī āñkhoñ ke piyāloñ meñ paḌe haiñ

is qaum pe zillat kī jamī gard to kyā hai

pākīza sahīfe bhī to jāloñ meñ paḌe haiñ

chāñdī ke hasīñ jaam meñ Duube the jo kal shab

sunte haiñ 'nabīl' aaj vo nāloñ meñ paḌe haiñ

kapDon mein makanon mein niwalon mein paDe hain

sab log inhin tin KHayalon mein paDe hain

hum ahl-e-nazar band hain tarik gharon mein

andhe hain ki din-raat ujalon mein paDe hain

rone se lakiren mere chehre pe bani hain

hansne se gaDhe aap ke galon mein paDe hain

tum sath na the jab to faqat ashk dhare the

ab KHwab bhi aankhon ke piyalon mein paDe hain

is qaum pe zillat ki jami gard to kya hai

pakiza sahife bhi to jalon mein paDe hain

chandi ke hasin jam mein Dube the jo kal shab

sunte hain 'nabil' aaj wo nalon mein paDe hain