kar rahe hain aap apni justuju main aur hawa

kar rahe haiñ aap apnī justujū maiñ aur havā

ek-jā ho jā.eñge shāyad kabhū maiñ aur havā

aa.egī fursat mayassar donoñ ko shāyad kabhī

kar hī leñge der tak phir guftugū maiñ aur havā

bhar ga.ī hai dhund zehnoñ meñ dayār-e-ġhair kī

be-sabab phirte nahīñ haiñ kū-bakū maiñ aur havā

ek sā rahtā kahāñ hai merā aur us kā mizāj

haiñ mulā.em aur kabhī haiñ tund-ḳhud maiñ aur havā

kyā batā.ūñ kis tarah sīñchī hai ham ne shāḳh-shāḳh

pesh aksar kar ga.e apnā lahū maiñ aur havā

jā-ba-jā sargoshiyāñ karne lagīñ parchhā.iyāñ

ghar se bāhar jab kabhī nikle haiñ tū maiñ aur havā

dil laraz uThtā hai aksar is gumāñ par be-tarah

pesh ho jā.eñge ik din rū-ba-rū maiñ aur havā

be-ḳhabar apne se ho kar lā.eñge apnī ḳhabar

is tarah se tai kareñge dasht-e-hū maiñ aur havā

baañT kar aapas meñ kūche aur galiyāñ shahr kī

toḌ deñge nafratoñ kā har subū maiñ aur havā

sochtā huuñ der se lā-hāsilī kī ret par

karte haiñ har ḳhvāb kyoñ nazr-e-numū maiñ aur havā

infirādī soch ham ko kar ga.ī tanhā 'farīd'

ho ga.e begāna-e-har-rang-o-bū maiñ aur havā

kar rahe hain aap apni justuju main aur hawa

ek-ja ho jaenge shayad kabhu main aur hawa

aaegi fursat mayassar donon ko shayad kabhi

kar hi lenge der tak phir guftugu main aur hawa

bhar gai hai dhund zehnon mein dayar-e-ghair ki

be-sabab phirte nahin hain ku-baku main aur hawa

ek sa rahta kahan hai mera aur us ka mizaj

hain mulaem aur kabhi hain tund-KHud main aur hawa

kya bataun kis tarah sinchi hai hum ne shaKH-shaKH

pesh aksar kar gae apna lahu main aur hawa

ja-ba-ja sargoshiyan karne lagin parchhaiyan

ghar se bahar jab kabhi nikle hain tu main aur hawa

dil laraz uThta hai aksar is guman par be-tarah

pesh ho jaenge ek din ru-ba-ru main aur hawa

be-KHabar apne se ho kar laenge apni KHabar

is tarah se tai karenge dasht-e-hu main aur hawa

banT kar aapas mein kuche aur galiyan shahr ki

toD denge nafraton ka har subu main aur hawa

sochta hun der se la-hasili ki ret par

karte hain har KHwab kyon nazr-e-numu main aur hawa

infiradi soch hum ko kar gai tanha 'farid'

ho gae begana-e-har-rang-o-bu main aur hawa