karam-e-KHas ka eajaz dikhaya kis ne

karam-e-ḳhās kā e.ajāz dikhāyā kis ne

Dūbne vaale batā tujh ko bachāyā kis ne

mujh pe ilzām-e-mohabbat to bajā hai lekin

pahle apnā qadam-e-shauq baḌhāyā kis ne

mere dil ne na kahā terī nazar ne na kahā

raaz ulfat kā zamāne ko batāyā kis ne

chāhne vāloñ kī nazroñ ko duā.eñ diije

aap ko ḳhalq meñ mahbūb banāyā kis ne

apnī tanhā.ī-e-vahshat pe hañsī aatī hai

jab na thā koī to phir mujh ko rulāyā kis ne

merī āshuftagī-e-shauq pe hañsne vaale

muskurā kar mujhe dīvāna banāyā kis ne

hairat-e-jalva thī yā sehr-e-tajallī 'mūsā'

mujh ko hī merī nigāhoñ se chhupāyā kis ne

karam-e-KHas ka eajaz dikhaya kis ne

Dubne wale bata tujh ko bachaya kis ne

mujh pe ilzam-e-mohabbat to baja hai lekin

pahle apna qadam-e-shauq baDhaya kis ne

mere dil ne na kaha teri nazar ne na kaha

raaz ulfat ka zamane ko bataya kis ne

chahne walon ki nazron ko duaen dije

aap ko KHalq mein mahbub banaya kis ne

apni tanhai-e-wahshat pe hansi aati hai

jab na tha koi to phir mujh ko rulaya kis ne

meri aashuftagi-e-shauq pe hansne wale

muskura kar mujhe diwana banaya kis ne

hairat-e-jalwa thi ya sehr-e-tajalli 'musa'

mujh ko hi meri nigahon se chhupaya kis ne