karam ke is daur-e-imtihan se wo daur-e-mashq-e-sitam hi achchha

karam ke is daur-e-imtihāñ se vo daur-e-mashq-e-sitam hī achchhā

na zindagī kī ḳhushī hī achchhī na be-sabātī kā ġham hī achchhā

talāsh kī sa.ī-e-rā.igāñ par nazar to aate haiñ ġharq-e-hairat

suḳhan-tarāzī-e-rahnumā se sukūt-e-naqsh-e-qadam hī achchhā

ziyā-e-nūr-e-yaqīñ hai rahbar hayāt kī tiira vādiyoñ meñ

bujhā ke dekheñ bujhāne vaale charāġh-e-tāq-e-haram hī achchhā

talab kī azmat talab kī zahmat talab kā hāsil talab kī lazzat

na ḳhauf-e-sūd-o-ziyāñ hī achchhā na ḳhatra-e-besh-o-kam hī achchhā

ma.aal kyā hogā bāġhbāno sukūñ-farāmosh irtiqā kā

nazar bhī aane lagī chaman meñ bahār-e-bāġh-e-iram hī achchhā

mujhe usī par hai naaz hamdam shikasta sāġhar ye hai to apnā

kise sunātā hai zikr-e-māzī balā se thā jām-e-jam hī achchhā

havās 'yāqūb' nukta-chīñ kyuuñ nazar hī to hai ye apnī apnī

nigāh-e-zauq-e-buland meñ hai sar-e-itā.at kā ḳham hī achchhā

karam ke is daur-e-imtihan se wo daur-e-mashq-e-sitam hi achchha

na zindagi ki KHushi hi achchhi na be-sabaati ka gham hi achchha

talash ki sai-e-raigan par nazar to aate hain gharq-e-hairat

suKHan-taraazi-e-rahnuma se sukut-e-naqsh-e-qadam hi achchha

ziya-e-nur-e-yaqin hai rahbar hayat ki tera wadiyon mein

bujha ke dekhen bujhane wale charagh-e-taq-e-haram hi achchha

talab ki azmat talab ki zahmat talab ka hasil talab ki lazzat

na KHauf-e-sud-o-ziyan hi achchha na KHatra-e-besh-o-kam hi achchha

maal kya hoga baghbano sukun-faramosh irtiqa ka

nazar bhi aane lagi chaman mein bahaar-e-bagh-e-iram hi achchha

mujhe usi par hai naz hamdam shikasta saghar ye hai to apna

kise sunata hai zikr-e-mazi bala se tha jam-e-jam hi achchha

hawas 'yaqub' nukta-chin kyun nazar hi to hai ye apni apni

nigah-e-zauq-e-buland mein hai sar-e-itaat ka KHam hi achchha