karam-nawaz ye sara jahan nahin na sahi

karam-navāz ye saarā jahāñ nahīñ na sahī

vo mehrbāñ hai koī mehrbāñ nahīñ na sahī

mirī jabīñ ko to matlab hai sajda-rezī se

nishān-e-sang dar-e-āstāñ nahīñ na sahī

ye ġham bhī un kī atā kī huī amānat hai

agar ye bā.is-e-taskīn-e-jāñ nahīñ na sahī

ġham-e-habīb salāmat rahe ye kyā kam hai

ḳhushī kā dil meñ jo nām-o-nishāñ nahīñ na sahī

chaman-parastoñ meñ apnā vaqār ab bhī hai

mirī nazar meñ agar bāġhbāñ nahīñ na sahī

kisī ke husn-e-atā par hai naaz ai 'nayyar'

hamārī fard-e-amal zau-fishāñ nahīñ na sahī

karam-nawaz ye sara jahan nahin na sahi

wo mehrban hai koi mehrban nahin na sahi

meri jabin ko to matlab hai sajda-rezi se

nishan-e-sang dar-e-astan nahin na sahi

ye gham bhi un ki ata ki hui amanat hai

agar ye bais-e-taskin-e-jaan nahin na sahi

gham-e-habib salamat rahe ye kya kam hai

KHushi ka dil mein jo nam-o-nishan nahin na sahi

chaman-paraston mein apna waqar ab bhi hai

meri nazar mein agar baghban nahin na sahi

kisi ke husn-e-ata par hai naz ai 'nayyar'

hamari fard-e-amal zau-fishan nahin na sahi