karam-nawazi-e-lail-o-nahaar bhi to nahin

karam-navāzī-e-lail-o-nahār bhī to nahīñ

bahut dinoñ se tirā intizār bhī to nahīñ

maiñ apne jaib-o-garebāñ bhī chaak kar luuñ magar

mire nasīb meñ koī bahār bhī to nahīñ

bahār ban ke to aa.e ho merī duniyā meñ

magar bahār kā kuchh e.atibār bhī to nahīñ

tamām umr ḳhamoshī se tum ko puujā hai

dil-o-nazar pe magar iḳhtiyār bhī to nahīñ

maiñ sochtī huuñ ki guzregī zindagī kyoñ kar

ki be-ruḳhī tirī ab nāgavār bhī to nahīñ

chale bhī aao ḳhudārā ki hai dam-e-āḳhir

ki mujh meñ tāb-o-tavāñ o qarār bhī to nahīñ

uTheñ to jaa.eñ kahāñ 'shā.era' yahāñ se ham

ajal kī raah rah-e-kū-e-yār bhī to nahīñ

karam-nawazi-e-lail-o-nahaar bhi to nahin

bahut dinon se tera intizar bhi to nahin

main apne jaib-o-gareban bhi chaak kar lun magar

mere nasib mein koi bahaar bhi to nahin

bahaar ban ke to aae ho meri duniya mein

magar bahaar ka kuchh eatibar bhi to nahin

tamam umr KHamoshi se tum ko puja hai

dil-o-nazar pe magar iKHtiyar bhi to nahin

main sochti hun ki guzregi zindagi kyon kar

ki be-ruKHi teri ab nagawar bhi to nahin

chale bhi aao KHudara ki hai dam-e-aKHir

ki mujh mein tab-o-tawan o qarar bhi to nahin

uThen to jaen kahan 'shaera' yahan se hum

ajal ki rah rah-e-ku-e-yar bhi to nahin