karam un ka KHud hai baDh kar meri hadd-e-iltija se

karam un kā ḳhud hai baḌh kar mirī hadd-e-iltijā se

mujhe sū-e-zan nahīñ hai ki duā karūñ ḳhudā se

dil-e-mutma.in kī vus.at koī kam hai mā-sivā se

mujhe kaahe kī kamī hai jo talab karūñ ḳhudā se

huī ḳhatm ġham kī āñdhī vahī dil kī lau hai ab bhī

yahī sho.ala thā vo sho.ala ki laḌā kiyā havā se

kahe kaun use patiñgā jo hai sho.ale par dhuāñ sā

tujhe le uḌe haiñ kitnā tire par zarā zarā se

jo hai sab kā dene vaalā maiñ usī ko chāhtā huuñ

mirī bhiik vo nahīñ hai ki mile kisī gadā se

ye hai qasr-e-zindagānī ki habāb-e-bahr-e-fānī

abhī ban gayā havā se abhī miT gayā havā se

ye ḳhayāl ḳhud hai aisā jo ḳhushī banā de ġham ko

ki hai ibtidā ḳhushī kī mire ġham kī intihā se

mirā dil razā pe raazī karam us kā josh par hai

jo ab aa ga.ī zabāñ tak to asar gayā duā se

mirī laakh minnatoñ par tirī ik hayā hai bhārī

koī parda hai vo parda ki hile-Dule havā se

tire pāk-bāz-e-ulfat nahīñ hārne ke himmat

jo mareñge Duub kar bhī to mareñge rah ke pyāse

kisī dil kī aas yuuñ bhī kabhī 'ārzū' na TuuTe

ye kahe banī hai dam par vo kahe mirī balā se

karam un ka KHud hai baDh kar meri hadd-e-iltija se

mujhe su-e-zan nahin hai ki dua karun KHuda se

dil-e-mutmain ki wusat koi kam hai ma-siwa se

mujhe kahe ki kami hai jo talab karun KHuda se

hui KHatm gham ki aandhi wahi dil ki lau hai ab bhi

yahi shoala tha wo shoala ki laDa kiya hawa se

kahe kaun use patinga jo hai shoale par dhuan sa

tujhe le uDe hain kitna tere par zara zara se

jo hai sab ka dene wala main usi ko chahta hun

meri bhik wo nahin hai ki mile kisi gada se

ye hai qasr-e-zindagani ki habab-e-bahr-e-fani

abhi ban gaya hawa se abhi miT gaya hawa se

ye KHayal KHud hai aisa jo KHushi bana de gham ko

ki hai ibtida KHushi ki mere gham ki intiha se

mera dil raza pe raazi karam us ka josh par hai

jo ab aa gai zaban tak to asar gaya dua se

meri lakh minnaton par teri ek haya hai bhaari

koi parda hai wo parda ki hile-Dule hawa se

tere pak-baz-e-ulfat nahin haarne ke himmat

jo marenge Dub kar bhi to marenge rah ke pyase

kisi dil ki aas yun bhi kabhi 'arzu' na TuTe

ye kahe bani hai dam par wo kahe meri bala se