karb baDhta ja raha hai baam-o-dar ko dekh kar

karb baḌhtā jā rahā hai bām-o-dar ko dekh kar

maiñ musalsal ro rahā huuñ apne ghar ko dekh kar

kyā 'ajab mela lagā hai dahr ke maidān meñ

ādamiyyat dam-ba-ḳhud hai ḳhair-o-shar ko dekh kar

varta-e-hairat meñ haiñ tārīḳh ke aurāq bhī

neze par qur.ān paḌhte ek sar ko dekh kar

kāmyābī ke liye to āzmā.ish shart hai

aur tū khīñche qadam nādīda Dar ko dekh kar

duur rakh is se ḳhudāyā ashk kī sauġhāt ko

jism merā chīḳhtā hai chashm-e-tar ko dekh kar

is Dagar ke kuchh musāfir so rahe haiñ qabr meñ

yaad kyā kuchh aa rahā hai rah-guzar ko dekh kar

chand sāñsoñ par hī takiya kar rahā huuñ āj-kal

ghūrtī hai zindagī zād-e-safar ko dekh kar

sāzishoñ kī bū 'ayāñ 'mājid' huī aflāk se

hañs rahe haiñ sab malā.ik dar-ba-dar ko dekh kar

karb baDhta ja raha hai baam-o-dar ko dekh kar

main musalsal ro raha hun apne ghar ko dekh kar

kya 'ajab mela laga hai dahr ke maidan mein

aadamiyyat dam-ba-KHud hai KHair-o-shar ko dekh kar

warta-e-hairat mein hain tariKH ke auraq bhi

neze par quran paDhte ek sar ko dekh kar

kaamyabi ke liye to aazmaish shart hai

aur tu khinche qadam nadida Dar ko dekh kar

dur rakh is se KHudaya ashk ki saughat ko

jism mera chiKHta hai chashm-e-tar ko dekh kar

is Dagar ke kuchh musafir so rahe hain qabr mein

yaad kya kuchh aa raha hai rah-guzar ko dekh kar

chand sanson par hi takiya kar raha hun aaj-kal

ghurti hai zindagi zad-e-safar ko dekh kar

sazishon ki bu 'ayan 'majid' hui aflak se

hans rahe hain sab malaik dar-ba-dar ko dekh kar