karb-e-judai aankhon mein aane nahin diya

karb-e-judā.ī āñkhoñ meñ aane nahīñ diyā

be-kār āñsuon ko bhī jaane nahīñ diyā

maiñ ne nikal ke ḳhud se banāyā tujhe ḳhudā

tū ne aqīdatoñ ko nibhāne nahīñ diyā

kuchh daan maañg letā magar raat dil ne bhī

soī huī parī ko jagāne nahīñ diyā

hotī qubūl us ke sivā kis kī rahbarī

dil ne hī inqilāb uThāne nahīñ diyā

āñkheñ thī merī kitnī rifāqat kī muntazir

maiñ ne unheñ ye ḳhvāb sajāne nahīñ diyā

ik rasm hai vafā ke liye be-vafā.eñ bhī

kyā zulm hai ki us ko nibhāne nahīñ diyā

sach hai use ḳhayāl mirī ḳhvāhishoñ kā thā

maiñ ne hī zer-e-lab unheñ aane nahīñ diyā

ik falsafa usī kī haqīqat se maañg kar

sar ko dar-e-butāñ pe jhukāne nahīñ diyā

karb-e-judai aankhon mein aane nahin diya

be-kar aansuon ko bhi jaane nahin diya

main ne nikal ke KHud se banaya tujhe KHuda

tu ne aqidaton ko nibhane nahin diya

kuchh dan mang leta magar raat dil ne bhi

soi hui pari ko jagane nahin diya

hoti qubul us ke siwa kis ki rahbari

dil ne hi inqilab uThane nahin diya

aankhen thi meri kitni rifaqat ki muntazir

main ne unhen ye KHwab sajaane nahin diya

ek rasm hai wafa ke liye be-wafaen bhi

kya zulm hai ki us ko nibhane nahin diya

sach hai use KHayal meri KHwahishon ka tha

main ne hi zer-e-lab unhen aane nahin diya

ek falsafa usi ki haqiqat se mang kar

sar ko dar-e-butan pe jhukane nahin diya