karishma humne dekha hai siyasat ki uDanon mein

karishma ham ne dekhā hai siyāsat kī uḌānoñ meñ

zamīñ be-lutf lagtī hai pahuñch kar āsmānoñ meñ

ye bādal kyoñ bhalā aapas meñ Takrā kar baraste haiñ

hamārī tarh kyā ye bhī baTe haiñ ḳhāndānoñ meñ

agar ik had muqarrar ho to ye tahzīb kī chiḌiyā

ulajh kar rah nahīñ saktī kabhī ūñchī uḌānoñ meñ

na karnā phir kabhī amn-o-amāñ kī guftugū ham se

sisaktī hai zabān-e-haq kuchh aise bad-zabānoñ meñ

chaman meñ kuchh parinde haiñ jo hijrat ke nahīñ qaa.il

mohabbat hai abhī zinda yahāñ nannhī sī jānoñ meñ

bahut bāteñ huiiñ lekin suno ik baat baaqī hai

abhī kuchh tiir baaqī haiñ siyāsat kī kamānoñ meñ

jahāñ pāmāl ho jaa.eñ hasīñ hoñToñ kī muskāneñ

lagā do aag tum aise khilaunoñ kī dukānoñ meñ

na jaane kis liye 'irfāñ' uḌī hai shāḳh se bulbul

bahut hai zā.iqa kaḌvā yahāñ ke āb-o-dānoñ meñ

karishma hum ne dekha hai siyasat ki uDanon mein

zamin be-lutf lagti hai pahunch kar aasmanon mein

ye baadal kyon bhala aapas mein Takra kar baraste hain

hamari tarh kya ye bhi baTe hain KHandanon mein

agar ek had muqarrar ho to ye tahzib ki chiDiya

ulajh kar rah nahin sakti kabhi unchi uDanon mein

na karna phir kabhi amn-o-aman ki guftugu hum se

sisakti hai zaban-e-haq kuchh aise bad-zabanon mein

chaman mein kuchh parinde hain jo hijrat ke nahin qail

mohabbat hai abhi zinda yahan nannhi si jaanon mein

bahut baaten huin lekin suno ek baat baqi hai

abhi kuchh tir baqi hain siyasat ki kamanon mein

jahan pamal ho jaen hasin honTon ki muskanen

laga do aag tum aise khilaunon ki dukanon mein

na jaane kis liye 'irfan' uDi hai shaKH se bulbul

bahut hai zaiqa kaDwa yahan ke aab-o-danon mein