karna jo mohabbat ka iqrar samajh lena

karnā jo mohabbat kā iqrār samajh lenā

ik baar nahīñ us ko sau baar samajh lenā

ham hoñ ki adū us meñ jo zulm kā shākī ho

kartā hī nahīñ tum ko vo pyaar samajh lenā

mar jaa.e magar jaanā us kī na ayādat ko

tum jis ko mohabbat kā bīmār samajh lenā

ban ban ke bigaḌtā hai vo kaam mohabbat meñ

āsān nahīñ jis ko dushvār samajh lenā

ġhaflat-kada-e-hastī jab kahte haiñ aalam ko

saudā hai phir apne ko hushiyār samajh lenā

mahfil meñ raqīboñ kī jaanā hai agar tum ko

sūrat se mujhe apnī bezār samajh lenā

dil par to lagāte ho tum tīr-e-nazar lekin

aahoñ ko hamārī bhī talvār samajh lenā

chheḌā jo mire aage phir tazkira-e-dushman

rakkhī huī hai mujh se takrār samajh lenā

poshīda 'hafīz' is meñ asrār-e-mohabbat haiñ

āsān nahīñ mere ash.ār samajh lenā

karna jo mohabbat ka iqrar samajh lena

ek bar nahin us ko sau bar samajh lena

hum hon ki adu us mein jo zulm ka shaki ho

karta hi nahin tum ko wo pyar samajh lena

mar jae magar jaana us ki na ayaadat ko

tum jis ko mohabbat ka bimar samajh lena

ban ban ke bigaDta hai wo kaam mohabbat mein

aasan nahin jis ko dushwar samajh lena

ghaflat-kada-e-hasti jab kahte hain aalam ko

sauda hai phir apne ko hushiyar samajh lena

mahfil mein raqibon ki jaana hai agar tum ko

surat se mujhe apni bezar samajh lena

dil par to lagate ho tum tir-e-nazar lekin

aahon ko hamari bhi talwar samajh lena

chheDa jo mere aage phir tazkira-e-dushman

rakkhi hui hai mujh se takrar samajh lena

poshida 'hafiz' is mein asrar-e-mohabbat hain

aasan nahin mere ashaar samajh lena