karo kuchh aur qayamat ka intizar abhi

karo kuchh aur qayāmat kā intizār abhī

mirī zamīn kā ujḌā nahīñ siñghār abhī

'atā kiye haiñ bahut bebasī ke dastāne

umiid kitnī lagā.e haiñ shahryār abhī

zamīñ agarche na.e qaht kī lapeT meñ hai

rukā nahīñ hai magar dast-e-kirdgār abhī

chalo du'ā ke charāġhoñ kī lau baḌhāte chaleñ

mileñge aur bhī dasht-e-siyāhkār abhī

abhī se kaise shab-e-hijr kī sazā de deñ

ki us kī god meñ hai shaam kī bahār abhī

qabā pe rang paḌā hai to itnī vahshat kyā

libās-e-jild bhī honā hai tār-tār abhī

ġharīb aañkh kī putlī kī himmatoñ ke nisār

huā nahīñ hai añdheroñ pe inhisār abhī

koī sune na sune tū sunā.e jā 'bāqar'

tire sitār meñ baaqī hai ek taar abhī

karo kuchh aur qayamat ka intizar abhi

meri zamin ka ujDa nahin singhaar abhi

'ata kiye hain bahut bebasi ke dastane

umid kitni lagae hain shahryar abhi

zamin agarche nae qaht ki lapeT mein hai

ruka nahin hai magar dast-e-kirdgar abhi

chalo du'a ke charaghon ki lau baDhate chalen

milenge aur bhi dasht-e-siyahkar abhi

abhi se kaise shab-e-hijr ki saza de den

ki us ki god mein hai sham ki bahaar abhi

qaba pe rang paDa hai to itni wahshat kya

libas-e-jild bhi hona hai tar-tar abhi

gharib aankh ki putli ki himmaton ke nisar

hua nahin hai andheron pe inhisar abhi

koi sune na sune tu sunae ja 'baqar'

tere sitar mein baqi hai ek tar abhi