karta hai wo jafa to kare main wafa karun

kartā hai vo jafā to kare maiñ vafā karūñ

yuuñ apnī dostī kā farīza adā karūñ

us kā shi.ār vo hai ye merā shi.ār hai

us kī jafā ke naam maiñ apnī vafā karūñ

us kā kabhī javāb na aayā na aa.egā

ye jānte hue bhī use ḳhat likhā karūñ

va.ade pe us ke aane ke ghar ko sajā liyā

ab us ke ba.ad bhī na vo aa.e to kyā karūñ

ik lamha merī samt ko vo multafit to ho

vo hāl-e-dil sune to bayāñ mudda.ā karūñ

kī us ne har qadam pe jafāoñ kī intihā

maiñ bhī na kyuuñ vafāoñ kī phir intihā karūñ

jis ne mirī hayāt ko tārīk kar diyā

phir bhī maiñ us kī raah meñ raushan diyā karūñ

vo hai jo mere qatl kā sāmāñ kiye hue

merā nahīñ shi.ār ki maiñ bad-duā karūñ

ġhālib kī ye zamīn hai 'shā.eq' ḳhudā-gavāh

kyuuñ kar maiñ is zamīn kā rutba sivā karūñ

karta hai wo jafa to kare main wafa karun

yun apni dosti ka fariza ada karun

us ka shiar wo hai ye mera shiar hai

us ki jafa ke nam main apni wafa karun

us ka kabhi jawab na aaya na aaega

ye jaante hue bhi use KHat likha karun

wade pe us ke aane ke ghar ko saja liya

ab us ke baad bhi na wo aae to kya karun

ek lamha meri samt ko wo multafit to ho

wo haal-e-dil sune to bayan muddaa karun

ki us ne har qadam pe jafaon ki intiha

main bhi na kyun wafaon ki phir intiha karun

jis ne meri hayat ko tarik kar diya

phir bhi main us ki rah mein raushan diya karun

wo hai jo mere qatl ka saman kiye hue

mera nahin shiar ki main bad-dua karun

ghaalib ki ye zamin hai 'shaeq' KHuda-gawah

kyun kar main is zamin ka rutba siwa karun