karte nahin jafa bhi wo tark-e-wafa ke sath

karte nahīñ jafā bhī vo tark-e-vafā ke saath

ye kaun sā sitam hai dil-e-mubtalā ke saath

ab vo jabīn-e-shauq kahīñ aur kyuuñ jhuke

vābasta ho ga.ī jo tire naqsh-e-pā ke saath

vārafta-e-jamāl kā aalam na pūchhiye

dīvāna-vār uThtī haiñ nazreñ sadā ke saath

surḳhī tumhāre haath kī kahtī hai saaf saaf

shāmil hai mere dil kā lahū bhī hinā ke saath

takmīl-e-ārzū kī ḳhushī aur ġham-e-hayāt

donoñ hī ibtidā se rahe intihā ke saath

shāmil mirī hayāt meñ yuuñ hai ġham-e-hayāt

jaise ḳhabar ho apne kisī mubtadā ke saath

'vasfī' mirī hayāt ne manzil ko pā liyā

kuchh din guzār aayā jo ik pārsā ke saath

karte nahin jafa bhi wo tark-e-wafa ke sath

ye kaun sa sitam hai dil-e-mubtala ke sath

ab wo jabin-e-shauq kahin aur kyun jhuke

wabasta ho gai jo tere naqsh-e-pa ke sath

warafta-e-jamal ka aalam na puchhiye

diwana-war uThti hain nazren sada ke sath

surKHi tumhaare hath ki kahti hai saf saf

shamil hai mere dil ka lahu bhi hina ke sath

takmil-e-arzu ki KHushi aur gham-e-hayat

donon hi ibtida se rahe intiha ke sath

shamil meri hayat mein yun hai gham-e-hayat

jaise KHabar ho apne kisi mubtada ke sath

'wasfi' meri hayat ne manzil ko pa liya

kuchh din guzar aaya jo ek parsa ke sath