karun bayan agar uski bewafai ka

karūñ bayān agar us kī bevafā.ī kā

zabāñ se naam na le koī āshnā.ī kā

na ishva-sāzī na ġhamze na naaz phūloñ meñ

hai saada husn meñ andāz dilrubā.ī kā

badan se jaan nikaltī hai ye ḳhabar de kar

kabhī hai vasl kā mausam kabhī judā.ī kā

huā halāk jo hābīl to kiyā kis ne

shurūa-e-dahr se qātil hai bhaa.ī bhaa.ī kā

habāb sat.h pe aate hī phuuT jaate haiñ

jigar-ḳharāsh hai anjām ḳhud-numā.ī kā

jahāñ meñ koī kisī kī ḳhabar nahīñ letā

sunā.ūñ haal kise apnī be-navā.ī kā

dikhā ke aa.ina kah do ki maiñ muqābil bhī

butoñ ke muñh se ho da.avā agar ḳhudā.ī kā

karun bayan agar us ki bewafai ka

zaban se nam na le koi aashnai ka

na ishwa-sazi na ghamze na naz phulon mein

hai sada husn mein andaz dilrubai ka

badan se jaan nikalti hai ye KHabar de kar

kabhi hai wasl ka mausam kabhi judai ka

hua halak jo habil to kiya kis ne

shurua-e-dahr se qatil hai bhai bhai ka

habab sath pe aate hi phuT jate hain

jigar-KHarash hai anjam KHud-numai ka

jahan mein koi kisi ki KHabar nahin leta

sunaun haal kise apni be-nawai ka

dikha ke aaina kah do ki main muqabil bhi

buton ke munh se ho dawa agar KHudai ka