karun jo tanqid zulmaton par

karūñ jo tanqīd zulmatoñ par

to aa.egā harf hikmatoñ par

futūr-e-millat junūn-e-maz.hab

ye raqs karte haiñ vahshatoñ par

shu.ūr-e-insān pal rahā hai

ḳhudā kī bastī meñ nafratoñ par

ye sāzishoñ ke muhīb saa.e

haiñ chhā.e sadiyoñ se ulfatoñ par

ye raqs kaisā hai jān-o-tan meñ

huuñ mahv-e-hairat mohabbatoñ par

mahak uThī haiñ fazā.eñ saarī

hai kaisī barsāt parbatoñ par

'shafaq' bahāyā na ik bhī aañsū

diloñ pe TuuTī qayāmatoñ par

karun jo tanqid zulmaton par

to aaega harf hikmaton par

futur-e-millat junun-e-mazhab

ye raqs karte hain wahshaton par

shuur-e-insan pal raha hai

KHuda ki basti mein nafraton par

ye sazishon ke muhib sae

hain chhae sadiyon se ulfaton par

ye raqs kaisa hai jaan-o-tan mein

hun mahw-e-hairat mohabbaton par

mahak uThi hain fazaen sari

hai kaisi barsat parbaton par

'shafaq' bahaya na ek bhi aansu

dilon pe TuTi qayamaton par