karun main aaghaz apne sajdon ka ai meri jaan kahan se pahle

karūñ maiñ āġhāz apne sajdoñ kā ai mirī jaañ kahāñ se pahle

kahā ḳhudā kis jagah nahīñ hai jahāñ se chāho vahāñ se pahle

'abas khaḌā sochtā hai saaqī ki ibtidā ho kahāñ se pahle

maiñ saaya sā saath kis liye huuñ jahāñ khaḌā hai vahāñ se pahle

yahī hai taḳhsīs rūh-o-tan kī ki vo sabab hai sabīl ye hai

punarjanm kī dalīl hai ye ki har makīñ thā makāñ se pahle

baġhair sur ke surūd kyuuñ kar na vaj.h ho to vujūd kyūñkar

ye baat mumkin nahīñ ki hoñ 'andalīb-o-gul bāġhbāñ se pahle

nazar jo aatī hai itnī ḳhilqat to is kā ḳhāliq bhī hai zarūrī

ho zehn-e-insāñ ḳhudā kā ḳhāliq huā ho beTā miyāñ se pahle

huā hai aksar ki apnā sajda badal gayā hai murāqabe meñ

vagarna ham aur musallī apnā uThā bhī lete azaañ se pahle

na ham se pūchho ki is buḌhāpe meñ 'ishq karne meñ raaz kyā hai

ki ek tūlānī dāstāñ hai hamārī is dāstāñ se pahle

yahāñ se pahle ki uTThī āvāz is sire se aur us sire se

to muskurā kar kahā ye saaqī ne lo miyāñ darmiyāñ se pahle

na fikr kar shaiḳh 'āqibat kī ki 'āqibat kī kise ḳhabar hai

jo ne'mateñ mil rahī haiñ le le vahāñ se pahle yahāñ se pahle

ishāratan āshkār kartā huuñ raaz ek ilm-e-ma.arifat kā

ki chāñd sūraj zamīñ sitāre na kuchh bhī thā āsmāñ se pahle

kise ḳhabar hai ki dil ne kin mushkiloñ se dāmān-e-zabt chhoḌā

kise ḳhabar hai ki aatī haiñ siskiyāñ bhī ashk-e-ravāñ se pahle

suḳhan kī rāhoñ meñ ai 'amar' huuñ maiñ apnī pasmāndagī pe shākir

ye mājrā bhī kabhī huā hai ki gard ho kārvāñ se pahle

karun main aaghaz apne sajdon ka ai meri jaan kahan se pahle

kaha KHuda kis jagah nahin hai jahan se chaho wahan se pahle

'abas khaDa sochta hai saqi ki ibtida ho kahan se pahle

main saya sa sath kis liye hun jahan khaDa hai wahan se pahle

yahi hai taKHsis ruh-o-tan ki ki wo sabab hai sabil ye hai

punarjanm ki dalil hai ye ki har makin tha makan se pahle

baghair sur ke surud kyun kar na wajh ho to wujud kyunkar

ye baat mumkin nahin ki hon 'andalib-o-gul baghban se pahle

nazar jo aati hai itni KHilqat to is ka KHaliq bhi hai zaruri

ho zehn-e-insan KHuda ka KHaliq hua ho beTa miyan se pahle

hua hai aksar ki apna sajda badal gaya hai muraqabe mein

wagarna hum aur musalli apna uTha bhi lete azan se pahle

na hum se puchho ki is buDhape mein 'ishq karne mein raaz kya hai

ki ek tulani dastan hai hamari is dastan se pahle

yahan se pahle ki uTThi aawaz is sire se aur us sire se

to muskura kar kaha ye saqi ne lo miyan darmiyan se pahle

na fikr kar shaiKH 'aqibat ki ki 'aqibat ki kise KHabar hai

jo ne'maten mil rahi hain le le wahan se pahle yahan se pahle

ishaaratan aashkar karta hun raaz ek ilm-e-marifat ka

ki chand suraj zamin sitare na kuchh bhi tha aasman se pahle

kise KHabar hai ki dil ne kin mushkilon se daman-e-zabt chhoDa

kise KHabar hai ki aati hain siskiyan bhi ashk-e-rawan se pahle

suKHan ki rahon mein ai 'amar' hun main apni pasmandagi pe shakir

ye majra bhi kabhi hua hai ki gard ho karwan se pahle