karun main jaan-o-jigar ab nisar mushkil hai

karūñ maiñ jān-o-jigar ab nisār mushkil hai

ho tum pe phir se mujhe e'tibār mushkil hai

yahāñ kī miTTī meñ shāmil hai ḳhuun merā bhī

mirī zamīñ pe tirā eqtidār mushkil hai

nahīñ hai ḳhair kisī kī tirī hukūmat meñ

ḳhizāñ ke rahte hī aa.e bahār mushkil hai

tumhāre sāmne ab sar nigūñ raheñge ham

hoñ dushmanoñ se qaul-o-qarār mushkil hai

tujhe rafīq samajh kar ziyāñ ko zahmat dī

banā.ūñ ab maiñ tujhe rāzdār mushkil hai

fasādī mulk pe qabza jamā.e baiThe haiñ

nizām-e-mulk ho yuuñ sāzgār mushkil hai

maiñ muddatoñ se huuñ tālib huqūq kā apne

ho mujh se aur bhī ab intizār mushkil hai

tire tamām mazālim ayaañ haiñ har ik par

tū ab kī baar bane tājdār mushkil hai

lahū se ham ne vatan kī zamīñ ko sīñchā hai

mile ab aisā koī jāñ-nisār mushkil hai

tujhe to logoñ ne sahvan banā diyā hākim

kareñ vo ik hī ḳhatā baar baar mushkil hai

har ek shaḳhs muḳhālif hai zulm kā 'hādī'

ye ittihād ho ab taar taar mushkil hai

karun main jaan-o-jigar ab nisar mushkil hai

ho tum pe phir se mujhe e'tibar mushkil hai

yahan ki miTTi mein shamil hai KHun mera bhi

meri zamin pe tera eqtidar mushkil hai

nahin hai KHair kisi ki teri hukumat mein

KHizan ke rahte hi aae bahaar mushkil hai

tumhaare samne ab sar nigun rahenge hum

hon dushmanon se qaul-o-qarar mushkil hai

tujhe rafiq samajh kar ziyan ko zahmat di

banaun ab main tujhe raazdar mushkil hai

fasadi mulk pe qabza jamae baiThe hain

nizam-e-mulk ho yun sazgar mushkil hai

main muddaton se hun talib huquq ka apne

ho mujh se aur bhi ab intizar mushkil hai

tere tamam mazalim ayan hain har ek par

tu ab ki bar bane tajdar mushkil hai

lahu se hum ne watan ki zamin ko sincha hai

mile ab aisa koi jaan-nisar mushkil hai

tujhe to logon ne sahwan bana diya hakim

karen wo ek hi KHata bar bar mushkil hai

har ek shaKHs muKHalif hai zulm ka 'hadi'

ye ittihad ho ab tar tar mushkil hai